Ripa, candidatu de Somos Asturies a la secretaría xeneral de Podemos nel país

Somos Asturies, nuna asamblea celebrada'l sábadu na Biblioteca d’Asturies ‘Ramón Pérez de Ayala’, decidió nomar a Daniel Ripa como candidatu a la secretaría xeneral de Podemos nel país. Esta corriente, que tien el sofitu de Compromisu por Asturies, algamó la victoria nes primaries municipales en 24 de los 32 conceyos nos que se presentó.

Ripa, investigador en paru de 33 años natural de la población aragonesa de Chaca y residente n’Uviéu, resultó escoyíu nun actu que dexó pequeña la instalación uviedina. Na so intervención pa pidir l’apoyu de los presentes, llamó a la creación de Podemos Asturies ente tola xenta que participa nel procesu de formación del partíu, “vengamos d’ú vengamos”, comprometiéndose “a tender un ramu d’olivu a toles persones que nun participaron en Somos y convidando-yos a trabayar xuntos pa construyir l’Asturies que ñaz”. Hai que recordar que pese a que Somos Asturies ye la corriente mayoritaria en tol país, nun consiguió l’apoyu mayoritariu n'ocho conceyos, ente ellos Xixón, el de mayor población. Ún de los rivales posibles de Ripa al cargu podría ser la eurodiputada Tania González Peñas.

El procesu de constitución de la organización de Podemos Asturies atópase anguaño na etapa d’inscripción de candidatures individuales, que va allargase hasta’l día 20. La campaña de los aspirantes va principiar el 27 y el plazu de votaciones va tener llugar del 9 al 13 de febreru. El día 14 conoceráse quién va ser el secretariu xeneral y los 34 miembros del Conseyu Ciudadanu.

Na semeya, Ripa nel centru con camisa de cuadros de tonu moráu, acompañáu polos secretarios xenerales llocales de Somos Asturies.