Riopedre celebró colos mayestros 20 años d'enseñu del asturianu

Xosé María García, al que munchos conocen por "Llábana" ye anguaño mayestru d'asturianu na escuela de Vega- La Camocha (Xixón) pero va venti años tocó-y ser ún de los mayestros de la escuela "Evaristo Valle" que nel cursu 1984-85 se convirtiere nun de los centros pilotu nos qu'entamó la primer esperiencia del asturianu como asignatura nel sistema educativu. Con esta esperiencia, Xosé María yera la persona indicada pa tar xunta'l conseyeru d'Educación José Luis Iglesias Riopedre encabezando la representación de mayestros d'asturianu nel actu de conmemoración de los venti años d'enseñanza del asturianu, pero lloñe de facer d'ello un actu simbólicu, Xosé María convirtió la so intervención nuna interpelación directa al conseyeru. Xosé María denunció que de neñu lu reprimieren na escuela por falar asturianu y que dempués de crecíu coincidiere en manifestaciones al favor de la llingua con actuales responsables políticos, casu del mesmu conseyeru Riopedre.

José Luis Iglesias Riopedre retrucó con una retafila de datos sobre la escolarización, destacando'l fechu de qu'anguaño seyan 16.000 escolinos los que reciben clas d'asturianu y recordó'l compromisu que "los partíos d'izquierda asumimos nel 1976" pa llevar la lingua a les escueles, argumentando qu'esi procesu pue que vaya más despacio de lo que munchos quixeren, pero qu'hai qu'andar nel camín hacia la oficialidá ensin falta de vivir na llucha permanente. El conseyeru dio anuncia tamién de que d'equí a poco va entanar una campaña oficial del so departamentu de gobiernu afalando a les families a matricular n'asturianu a los sos fíos.

Con too y con ello, les estadístiques de la escolarización n'asturianu espeyen unes cifres que nun dan pa munchu optimismu. Nel cursu del 84 foron 1351 los escolinos d'asturianu nos 6 centros pilotu qu'entamaron cola asignatura, espoxigando esa cifra hasta llegar al cursu 95-96, nel que se llegó a un másimu históricu de 19.737 escolinos recibiendo clas d'asturianu en 150 centros de primaria. Los 16.000 actuales de los que falaba ayeri Riopedre son una cantidá enforma más pequeña, anque tamién influya nello la cayida demográfica.