Río Narcea anuncia'l meyor resultáu de la so historia

La compañía minera de capital canadiense Río Narcea Gold Mines ta acabante de facer públicos los resultaos del exerciciu 2.002, en que la empresa baltió toles marques n'estracción y comercxialización del oru del occidente asturianu, algamando un resultáu financieru que ye'l meyor de tola historia de la empresa. En total Río Narcea Gold Mines (RNGM) 177,225 onces del metal mariello nes mines de Balmonte y Cangas del Narcea, un 42% más que nel exerciciu 2.001, mientres que na estaya financiera, la empresa repartió un beneficiu de 9,697,500 de dólares (0.13 per acción) en comparanza cola perda de 3,714,500 de dólares que tuvo la compañía nel 2001. La mina d'El Valle aportó nel exerciciu 177,225 onces a un costu de 143 dólares cauna, un coste baxu según la compañía porque la concentración d'oru ye mui alta, llegando a los 7.75 gramos per tonelada d'estériles procesada, un rendimientu que baxa hasta los 4.65 gramos per tonelada na mina de Carllés, el pueblu que la mina esborrió del mapa va tres años pa entamar la esplotación n'abertal.

Pa esti añu 2.003 Río Narcea diz que va dir dexando la esplotación n'abertal pa entamar cola minería d'oru baxo tierra, agora que yá tienen escarbaes les boques más importantes pa la parte de Boinás. Sicasí, l'apueste más fuerte de la multinacional esti añu va ser la mina andaluza de niquel d'Aguablanca, que va ser onde más inviertan n'instalaciones nueves y apertura de pozos.