Ricardo Candás lleva’l XIX Premiu Xuan María Acebal de poesía cola obra ‘Superficie del silenciu’

El poemariu ‘Superficie de silenciu’ del xixonés Ricardo Candás resultó la obra ganadora del XIX Premiu Xuan María Acebal de poesía. Ésti ye’l segundu gallardón que falla la conseyería, yá que Marisa López Diz llevó’l de lliteratura infantil.

El XIX Premiu Xuan María Acebal, dotáu con 3.000 euros, recayó en ‘Superficie de silenciu’ por “la solidez d'una obra unitaria que crea una atmósfera de sensaciones alredor de la memoria, el destín y el presente, estableciendo un diálogu ente la voz y el silenciu”, destacó nel acta’l xuráu. Ésti tuvo compuestu polos escritores José Ángel Gayol –ganador de la edición anterior del premiu– y Irma González-Quevedo Pedrayes; la profesora de Filoloxía de la Universidá d'Uviéu, Elena de Lorenzo Álvarez; y el  filólogu adscritu a la Direición Xeneral de Política Llingüística, Xosé Miguel Suárez Fernández ‘Tapia’. A esta edición del gallardón qu’entrega’l Gobiernu presentáronse un total de nueve obres.

Ricardo Candás  (Xixón, 1970) ye llicenciáu en Filosofía pola Universidá d'Uviéu y cuenta nel so palmarés con dellos premios lliterarios, como'l Fernán Coronas del 2005, col poemariu ‘Quiciás seya payares’; el Llorienzu Novo Mier del 2010, cola obra ‘Nos díes pensatibles’; y el Nené Losada Rico del (2011), col poemariu ‘Naufraxos’. Ente otros trabayos, l’escritor espubliza davezu en revistes como ‘Formientu’ o ‘Lletres Asturianes’.

El María Xosefa Canellada, pa López Diz

Díis enantes del fallu del Xuan María Acebal, celebráu ayeri, diose a conocer que’l trabayu ‘Tatuaxes nel corazón’, de López Diz, resultó ganador del VI Premiu María Xosefa Canellada de lliteratura infantil y xuvenil. Nesta ocasión, el xuráu tuvo conformáu polos escritores y especialistes en lliteratura infantil y xuvenil Milio Rodríguez Cueto, Maite González Iglesias, Paz Fonticiella Gutiérrez y José Luis Remis García; xunto con Alonso Zamora Canellada, fíu de l’autora que da nome al gallardón; y Ana María Fueyo, direutora xeneral de Política Llingüística, que presidió l’órganu de decisión.

«L'adecuación temática y formal a la edá de los llectores a la que va dirixida la obra, qu'amás avera la lliteratura xuvenil a la modernidá de les nueves tecnoloxíes y elementos gráficos», foi la causa principal que llevó al xuráu a escoyer esta obra ente los ochos trabayos candidatos, lo que va suponer pa la escritora un premiu de 3.000 euros. Marisa López Diz (Xixón, 1970) ye llicenciada en Filoloxía Hispánica y especialista n'asturianu y gallego-asturiano, llingües nes qu'escribe davezu tanto poesía como narrativa. Tien ganao premios lliterarios como'l Fernán Coronas del 1998, l'Elvira Castañón del 2001 o'l Premio Xeira del 2007. Amás de la lliteratura, tamién trabaya la música, dao que forma parte del dúu Mestura, col que publicó dos discos, ‘Agua del norte’ (2006) y ‘Poemes de carambelu’ (2008). Anguaño, ta grabando ‘A terra esqueicida’, sobre poemes del so llibru homónimu.