Ribeseya va contar con un serviciu de normalización llingüística l'añu qu'entra

|
Genaro Alonso presentación presupuestos Educación y Cultura 2019

Genaro Alonso presentó les cuentes de la Conseyería d'Educación y Cultura pal 2019.

Foi na tarde d'ayeri na Comisión de Facienda y Sector Públicu Xunta Xeneral, con unes cifres qu'algamen los 837.685.097 euros, lo que supón una medra del 6,08 por cientu. Na so intervención destacó que la promoción del asturianu vive un aumentu de 142.166 euros, un 9,10 por cientu más con respeuto al proyeutu prorrogáu del 2018, calteniendo les actividaes que se veníen desendolcando, como les subvenciones a medios de comunicación, discos y llibros, les ayudes a los servicios de normalización llingüística o la tresferencia a l'Academia de la Llingua Asturiana "que nos caberos trés años aumentó en 37.500 euros".

Nesi sen, avanzó la creación del Serviciu de Normalización Llingüística de Ribeseya y citó los yá anunciaos 70.000 euros pa la "promoción del asturianu na TPA" que forma parte del alcuerdu d'apoyu a los presupuestos ente Podemos y la Federación Socialista Asturiana (FSA). Otra manera, ente otres munches cuestiones, el conseyeru punxo énfasis nel enfotu del so departamentu de reforciar la calidá educativa mediante la consolidación del emplegu públicu, cola mayor ufierta de la historia pa Educación Primaria: 781 places pa docentes en siete especialidaes.

Semeya obra d'Armando Álvarez.

Contador Estadistiques