Rey Menéndez gana’l IX Concursu Manuel Nevado Madrid de rellatos mineros na estaya d’asturianu

‘L’esbarrumbu’, de Rubén Rey Menéndez, resultó la obra ganadora del IX Concursu de Microrrellatos Mineros Manuel Nevado Madrid na estaya d’asturianu. Pablo Rodríguez Medina llevóse una mención por ‘Fragmentu d’una seronda rara’.

L’alta participación foi, otra vuelta, la nota más destacada d’esti concursu qu’entama la Fundación Juan Muñiz Zapico, de Comisiones Obreres (CC OO), pa honrar al históricu líder mineru antifranquista Nevado Madrid. Nesta ocasión, 191 microrrellatos entraron a concursu, lo que supón 30 más que na edición pasada, dalgunos d’ellos procedentes de fuera del Estáu, yá que la organización recibió unvíos de México, Estaos Xuníos, Nicaragua, Hondures, Perú, Colombia, Arxentina y Suecia, ente otros. Amás, hubo representación de toles comunidaes autónomes.

El xuráu compuestu pol caderalgu de Lliteratura Benigno Delmiro Coto, que’actuó como presidente, Casimiro Palacios García, Vicente Bernaldo de Quirós, Ana Alonso Cabrera y Marcelino Álvarez, decidióse por rellatu de Rey Menéndez –que tamién podía aspirar al trunfu absolutu– como’l meyor en llingua asturiana, lo que supón una recompensa de 350 euros dividíos en 200 en metálico y 150 en llibros pal escritor uviedín. ‘L’esbarrumbu’ ye la viviencia d’un mineru, sobreviviente únicu d’un accidente con cuatro víctimes mortales, contada al traviés d’una tercera persona, un collaciu, y el sentimientu de culpa que siente por nun tar al lláu d’un compañeru nel so aliendu caberu. Pela so parte, Rodríguez Medina recibió una mención especial por ‘Fragmentu d’una seronda rara’.

La ganadora absoluta del IX Manuel Nevado Madrid, que se dio a conocer ayeri coincidiendo cola festividá de Santa Bárbola, foi la italiana, residente en Madrid, Mara Maroni con ‘¡Madrid obrero, saluda a los mineros!’. Mentes, l’áccesit mozu –menor de 26 años– llevólu Alicia Calvo Panera por ‘Los días del carbón’, y el de testimoniu históricu, Charo Cuba Penabada por ‘Exilios’. A primeros del 2013 va editase un llibru con tolos microrrellatos ganadores, asina como colos testos que recibieron menciones especiales.