Retrásase la fin de los teléfonos rurales

El gobiernu del estáu tenía qu'anunciar güei el plan definitivu pa camudar los más de 230.000 teléfonos celulares (TRAC) qu'entovía funcionen pelos pueblos d'España. Los TRAC valieron pa muncho de la que se punxeron a primeros de los 90, pero anguaño tan desfasaos, col puntu feble de que nun apurren anchu de banda como pa conectase a internet. Galicia y Asturies son les comunidaes onde más hai d'estos teléfonos, con más de 20.000 abonaos asturianos qu'entovía carecen estos teléfonos. La operación pa desaniciar estos teléfonos cuesta sobre 475 millones d'euros de los qu'había 144 yá comprometíos por Europa, al traviés de fondos FEDER, y l'añu pasáu hubo un concursu ente les empreses pa repartir el trabayu, pero la noticia ye que nun hai plan porque Telefónica y les compañíes que van participar na obra nun acaben de ponese d'alcuerdu nel respartu d'esta grandísima obra. Como operador principal, Telefónica d'España tien la obligación por llei de poner serviciu universal a Internet pa tolos ciudadanos, y pa iguar la situación de los TRAC punxo un concursu l'otru veranu, a esti presentáronse furnidores d'accesu a internet vía LMDS (radio ensin cables): la propia filial Telefónica Móviles, Neo Sky, Iberbanda, Broadnet y BASA, esta filial hasta va bien poco d'Hidrocantábrico, que dexó la empresa pa centrase nel negociu del cable. Ente la falta d'alcuerdu, y como les ufiertes que se presentaron parez que dexaben llugares ensin atender, la mesma operadora española propón agora que se faiga la operación aplicando les cuatro tecnoloxíes d'accesu: la tradicional de filu de cobre, el LMDS, la telefonía móvil al traviés del GSM-GPRS y el satélite. La solución, seguramente pa la selmana qu'entra, en cuantes que TElefónica tien que dar una rempuesta pal día 22.