Retiróse l’últimu artesanu asturianu que facía toneles

José Manuel Sánchez Blanco, l'últimu artesanu asturianu que facía toneles y pipes de madera pa sidra, dexó l'oficiu estos díes dempués d'entregá-y al llagareru samuel Trabanco la so última creación, un tonel de 34.000 llitros que-y tomó 430 hores de trabayu artesanu, cuasimente añu y mediu de llabor.

Cola so retirada desapaez la tradición artesana asturiana de facer pipes y toneles de madera de castañal pa la sidra. Trátase d'un oficiu artesanu dafechu que nun almite l'emplegu de maquinaria nenguna y tamién d'una manera especial d'entender l'arte de facer sidra, en cuantes que como diz el mesmu Samuel Trabanco, propietariu de la pieza, "la sidra formentao en tonel de castañu presenta unes característiques úniques" característiques que se venceyen directamente cola porosidá d'esta madera que permite que la sidra trespire, lliberando'l gas meyor que nos tanques de freba o de metal en que se fai agora lo más de la sidra que se consume.

Con da-y meyor calidá a la sidra, y incluso con tener una vida útil bien llarga d'alredor de cuarenta años, los toneles tradicionales pa sidra de madera son tamién enforma más caros y precisen d'un caltenimientu más intensivu, colo que namás unos pocos llagareros s'atreven a renovar les sos antigües pipes de madera por otres asemeyaes y los más d'ellos lleven años faciendo un apueste yá afitáu polos materiales "modernos". D'agora en p'alantre, quien quiera ún d'estos toneles de madera va tener que dir a pidilu fuera del país.