Retevisión cortó la señal de TeleAsturias, que va siguir emitiendo per internet

La concesionaria de la señal de TV Retevisión confirmó'l corte de les emisiones de la canal Tele Asturias dende les 13.00 hores de la tarde d'esti vienres. Anque la esplicación oficial que se-y da a la midida ye la de "dar pasu a les emisiones de la televisión dixital" ámbitu nel que TeleAsturias nun tien llicencia pa emitir, dende la canal privada de televisión ello interpretóse como un "actu dictatorial del Gobiernu Areces" contra una canal qu'hasta agora tuviera una llinia editorial mui crítica contra l'executivu asturianu.

El pieslle d'emisiones de TeleAsturias llevantó les crítiques de cuasimente tol arcu políticu parlamentariu y estraparlamentariu asturianu, sacantes el PSOE. Asina, el presidente del Partíu Popular calificó'l corte d'emisiones de TeleAsturias como daqué "vergoñoso" y afirmó que ye "gravísimo" que, "en plena democracia, se pieslle un mediu de comunicación cenciellamente porque'l presidente Vicente Álvarez Areces, nun tea a gustu con elli".

Pela parte d'Izquierda Xunida Jesús Iglesias declaró que que pesllar una televisión a dos meses de les elecciones "ye una cacicada" pidiéndo-y al executivu que dea marcha atrás. Lo mesmo Jesús Iglesias qu'otros representantes de la coalición desmarcáronse, en cuantes que parte del gobiernu, de cualquier responsabilidá sobre'l corte d'emisiones de la canal, asegurando que la midida nun pasó per Conseyu de Gobiernu y que la decisión la tomare unillateralmente la Conseyería d'Alministración Pública ensin el so consentimientu.

Dende l'ámbitu del asturianismu políticu tamién hebo reacciones contraries al corte d'emisiones de Tee Asturias.

La formación Izquierda Asturiana esixó al traviés del so candidatu Inaciu Llope "una rectificación del gobiernu asturianu" a una midida que ye "un pasu más na dinámica represiva contra toos aquellos que desafíen la visión arecista de la realidá d'Asturies, basada nun optimismu delirante" dalgo que-y abulta "inaceptable nun país democráticu". Pa IAS, el pieslle de TeleAsturias amiéstase a otros como'l de Cándido y Morala, el xuiciu contra miembros de la Xunta pola Defensa de la Llingua Asturiana o'l que se fexo a la sindicalista Beatriz Quirós, o la brutal carga policial en el Hospital Central d'Asturies. Llope calificó tamién de "patética" l'actitú d'Izquierda Xunida al demostrar que la coalición "nun ye quien a enfrentase a los desmanes arecistes nin en nos casos más estremos".



En términos asemeyaos s'espresó la Xunta Executiva d'Andecha Astur, que nún comunicáu que firma Germán Abad, declara que'l pieslle de Tele Asturias "amuesa la peor cara represora y censora" del executivu asturianu". La organización nacionalista califica la midida de "totalitarismu bananeru" y de "atentáu a la llibertá d'espresión" amosando "la nuestra solidaridá colos trabayadores de Teleasturias". Dende AA repítense les crítiques hacia la postura de d'IX, pidiéndose la dimisión de los sos conseyeros pola so inhibición.