Resume de les intervenciones na sesta sesión de la comisión del asturianu na Xunta

Nesta ocasión participaron nueves persones de diferente campos profesionales.

Na mañana d’ayeri celebróse na Sala Constitución de la Xunta Xeneral una xornada nueva de la Comisión Especial d’Estudiu sobre'l Réxime de Proteición y Promoción del Asturianu. Xabiel González Menéndez, presidente de Xeira; Francisco José Llera Ramo, caderalgu de Ciencia Política y autor de los estudios sociollingüísticos fechos n’Asturies; José Manuel Pérez Fernández, lletráu del Tribunal Constitucional y profesor titular de Derechu Alministrativo de la Universidá d’Uviéu; l’espertu gastronómicu Lluis Nel Estrada; el biólogu Ordiales; el sacerdote José Manuel García de Jesús 'Pin', presidente del Coleutivu Manuel Fernández de Castro; Carlos Pulgar, voceru nacional de la Xunta pola Defensa de la Llingua Asturiana (XDLA); Fernando Álvarez-Balbuena, vicepresidente de l’asociación El Teixu-Rede pal Estudiu y Defensa de la Llingua Asturllionesa; y Penélope Miranda, vocera de l’Asociación de Trabayadores de la Normalización Llingüística.foron los convidaos nesta ocasión, y éstes les sos declaraciones principales.

• González Menéndez: “La situación é dramática pal gallego-asturiano y l’asturiano” / “Os nenos y os bolos falaben. Agora os bolos charren y os nenos non falen gallego-asturiano”. / “Non voi falar d’oficialidá. É imprescindible”.
• Llera: “Perder una llingua ye la erosión de parte del conocimientu humanu. Hai que defendeles como se defiende a la biodiversidá” / “La proteición d'una llingua ye obligación ineludible d'un grupu humanu. Lo debatible ye cómo protexela, y eso ye cuestión de voluntá política” / “Cualquier decisión tien que partir d’un consensu” / "Tamos meyor n'habilidaes llingüístiques; peor n'identificación llingüística (normalización social,espaciu públicu del idioma…)" / “Ye un milagru de los falantes, pese a les torgues y escasez de medios, la situación de la llingua asturiana” / “Soi optimista sobre l'asturianu, pero pa dar un saltu cualitativu hai que facer les coses de manera distinta”.
• Pérez Fernández: “La situación del asturianu y el gallego-asturiano ye anómala” / “La llingua propia del Principáu ha de ser declarada como oficial. Llueu hai que modular l’algame d’esa oficialidá cola aprobación d’una Llei de Normalización Llingüística” / “La oficialidá garantizaría los derechos llingüísticos, la pervivencia del idioma y una progresiva equiparación de los derechos llingüísticos” / “Ye una cuestión de voluntá política. Xurídicamente nun hai nada qu'impida la creación de la especialidá docente”.
• Estrada: “Ye la nuestra llingua asturiana tan importante cuando mos referimos al sector agroallimentariu y a la gastronomía asturiana que nun podrían pescanciase estos caberos ensin la primera. Porque los nuestros productos de calidá y la nuestra gastronomía denómense, falen y esprésense n’asturianu” / “La Denominación d’Orixe de la llingua asturiana nun ye otro que la oficialidá” / “Ensin oficialidá, l'asturianu nun tien futuru y acabará desapaeciendo, como fadría'l Cabrales ensin la Denominación d’Orixe” / “El turista ye'l que menos s'estraña d'atopar una carta n'asturianu. Ve qu'hai una cultura detrás".
• Ordiales: "¿Por qué perder esta riqueza?" / “La non oficialidá ye una prohibición inconcebible"
• Pin: “Vamos hacia’l desaniciu dafechu del asturianu. Ye un motivu de preocupación dende l'humanismu cristianu” / La primer de les midíes ha de ser la oficialidá. Nun ye condición suficiente, pero sí condición necesaria" / "Los Derechos Humanos nun se pueden votar" / "La xente que demanda un oficiu n'asturianu depende de la bona voluntá del Obispáu o del cura".
• Pulgar: “Nun hai yá debate posible sobre si l’asturianu tendría que contar col reconocimientu oficial o primero habría qu’avanzar nuna normalización” / “La oficialidá, como recordaba va poco la presidenta de l’Academia de la Llingua Asturiana (ALLA), Ana Cano, efectivamente nun ye la solución pa salvar l’idioma, pero nun hai solución ensin oficialidá” / “Nun creyemos que sía’l momentu de pidir la oficialidá. Ye’l momentu de dicir, agora y equí, cómo tenemos que tener yá esa oficialidá” / “Nun ye sostenible mantener esta situación más tiempu”.
• Álvarez-Balbuena: “La política llingüística realmente esiste y tien ésitos y tamién limitaciones. L’ésitu ye que tuvo unos resultaos magníficos y el fracasu, que nadie nun vamos ver la muerte del asturianu, del asturlleonés” / "Hai que problematizar la suerte del asturianu".
• Miranda: “La política llingüística ye probe y los servicios de normalización llingüística encáuzenla sólo nel ámbitu cultural” / “Nun se corrixen los errores que-yos treslladamos" / "L'estatus xurídicu qu'equipara a les llingües ye la oficialidá, pero fai falta tamién una Llei de Normalización que la desenvuelva” / “Hai qu’axuntar esfuercios y non francer una riqueza patrimonial de tolos asturianos”.

Na cuenta de Twitter d’Asturies.com comentamos en direuto tola sesión. Calcando nesti enllaz pue consultar cómo se desendolcó la mesma minutu a minutu y conocer les declaraciones principales de los comparecientes y representantes políticos.