Respuestes de sofitu a Pumares énte la campaña de presión que sufre de sectores contrarios a la oficialidá

Unes pegatines cola imaxe d’Adrián Pumares y la pallabra ‘Vendido’ ye’l pasu últimu dau por sectores contrarios a la oficialidá na so campaña d’ataque al idioma, intensificada nes selmanes últimes cola apertura de negociaciones pa la reforma del Estatutu d'Autonomía. El diputáu de Foro ta recibiendo numberoses amueses de sofitu en redes.

Adrián Barbón, la diputada de Podemos nel Congresu Sofía Fernández Castañón o’l presidente de l’Academia de la Llingua Asturiana Xosé Antón González Riaño, amás de numberosos ciudadanos, espublizaron en redes mensaxes de sofitu a Pumares, condenando al empar esti tipu de práutiques. “En Democracia hai que respetar les opciones de toles persones y, por supuesto, a los que piensen diferente. Tola mio solidaridá con @adrianpumares, voceru de @FOROAsturias, pola campaña d’acosu que ta sufriendo. Defendamos la Democracia y la Llibertá, siempre”, espresó’l presidente del país en castellanu.

Pela so parte, González Riaño apuntó que “cuando nel debate políticu nun s'almiten les posiciones de la mayoría desapaecen les riegles de xuegu y trespásense toles llendes democrátiques. Hemos tar al llau d'@adrianpumares énte estes actitúes”. “Esti tipu de señalamientos ye inaceptable en democracia y estos antiasturianos busquen tantos enemigos que-yos queda una Asturies mui piquiñina. La mio solidaridá con @adrianpumares #oficialidá”, escribió Fernández Castañón.