Respuesta ciudadana al "despropósitu cultural" de retirar los nomes daos a 17 cais n'Uviéu

Demanden esplicaciones públiques sobre por qué Aurora de Albornoz, María Xosefa Canellada, Concepción Arenal o Charles Darwin pierden l'honor de contar con una vía na ciudá.

El Conceyu d'Uviéu va tornar a camudar el nome de 17 cais con nomes venceyaos a la dictadura franquista, al que se podía sumar dalgún más por cuenta propia, en cumplimientu a la Llei de Memoria Histórica. Los puestos pol gobiernu municipal anterior de PSOE, Somos y IX nel 2017, que foron retiraos polos recursos del PP y de la Hermandad de Defensores de Oviedo aceptaos pol xuez hai agora un añu, nun van volver, lo que ta provocando numberoses quexes.

Una d'elles vien del ámbitu universitariu, en defensa del caltenimientu del honor a Aurora de Albornoz a recuperar la so cai, agora nomada Rafael Gallego Sainz. Begoña Camblor, vocera de la familia, presentó nel Rexistru un testu con 202 firmes de sofitu a esta demanda, ente elles 60 pertenecientes a caderalgos, especialistes en lliteratura, editores y estudiosos de la obra d'Albornoz como Xosé Antón González Riaño, Marta Mori, Esther Prieto o Vicente García Oliva.

"Nun pue dexar de sorprendenos la decisión que la xunta de gobiernu llocal quier tomar nes selmanes próximes. Nun quitamos valor a nenguna de les personalidaes que puedan sustituyir a los güei homenaxaos nes nueses cais, pero nos gustaría, en primer llugar, que s'esplique de forma pública a la ciudadanía les razones poles qu'Aurora de Albornoz, Alfonso Camín, Gloria Fuertes, María Xosefa Canellada, Charles Darwin, Federico García Lorca, Sara Suárez Solís, Concepción Arenal o Amparo Pedregal, por citar solamente dalgunos de los casos más destacaos, requieren que se-yos sía retirada la so cai", demanden.

Escasez de muyeres

Califiquen amás de "despropósitu cultural" que supón esta eliminación pola "escandalosa escasez de nomes de muyeres nes cais d'Uviéu, que foi reparada en parte pol anterior gobiernu municipal. Torna la situación precedente ensin que naide nun se paeza dar cuenta de la evidente falta de referentes femeninos qu'agospiará la nuesa ciudá en plenu sieglu XXI".

PSOE y Somos, mentes, calificaron la decisión de "despreciu absolutu de les muyeres por parte d'esti equipu de gobiernu" y "un actu de violencia machista institucional" nun actu de denuncia entamáu por 12 de les entidaes que conformen el Conseyu d'Igualdá. Pela so parte, Iniciativa pol Asturianu presentó una reclamación pa caltener el nome de María Xosefa Canellada, "una escritora mui importante non sólo pa la llingua asturiana, sinón tamién pa la española, siendo nomada miembru de la Real Academia Española nel añu 1986 y de la propia Academia de la Llingua Asturiana dende la so fundación", porque ye dar a una cai "el nome de la cultura, estudiu, esfuerciu, y reconocer el papel de la muyer na lliteratura asturiana".

Na imaxe, Casa Conceyu. Semeya obra de Javier Losa baxo llicencia CC BY 2.0.