Responsables del estrozu

El Castru de Cellagú vuelve a ser noticia. La polémica decisión de la Xunta de Patrimoniu de nun sofitar la declaración de Bien d'Interés Cultural el xacimientu uviéin dexo'l castru al aldu de la espansión de la cantera que llinda con elli. Anque la Conseyería de Cultura intentó quedar a bien con tol mundu garantizando que los elementos más importantes del Castru de Cellagú van treslladase a un aula d'interpretación, lo cierto ye que l'allugamientu d'un de los castros más importantes d'Asturies, y l'únicu qu'hai na rodiada d'Uviéu, va acabar fechu trito nes hormigoneres de la empresa Readymix Asland.Cola solicitú de declaración como BIC del castru en procesu, en xineru de 2000 la Conseyería de Cultura encargó-y a la Real Academia de la Historia un informe sobre Cellagú pa ver si se-y daba'l preste o non a la declaración como BIC. El caderalgu de la Complutense Martín Almagro-Gorbea fizo un informe favorable al caltenimientu del castru y la so declaración como BIC, una midía que votó a favor la Xunta de Gobiernu de la RAH. La decisión académica nun se tuvo en cuenta y, inda más, paez que se fizo lo posible por esconder l'informe académicu, según denunció IX. Nun ye la única crítica a l'actuación de la Conseyería, ya que dende IAS denuncien que, anque anque la Comisión de Patrimoniu desestimare la declaración de BIC, ésta nun ye más qu'un organismu consultivu de los cargos políticos, que sedrán los responsables de la desapaición d'un castru únicu.