Representantes de SUATEA aconceyen güei con Zapatero

La confederación de sindicatos d'enseñanza STES, na que s'enxerta la organización asturiana SUATEA, aconceya esta mañana col Presidente del Gobiernu pa debatir con elli la posible reforma de la Llei Orgánica d'Enseñanza.

Nuna selmana en que'l Congresu de los Diputaos va debatir a lo llargo de cuatro díes les enmiendes presentaes a la Llei d'Educación, Zapatero aconceya güei con una delegación de representantes de les trés mayores centrales estatales d'enseñanza, la Confederación de Sindicatos de Trabajadores de la Enseñanza (STES), la federación d'Enseñanza de CCOO, FETE-UGT y la Confederación d'Asociaciones de Padres y Madres d'Alumnos (CEAPA).

L'asturiana Beatriz Quirós va ser la representante de SUATEA nel alcuentru con Zapatero, nel que les organizaciones van pidí-y a Zapatero que nun almita les esixencies de les organizaciones conservadores coles qu'aconceyó la selmana pasada. Otramiente, la representante asturiana va tresmití-y a Zaatero un mensaxe claru al favor de que la reforma educativa-y dea preferencia a la escuela pública sobre la particular.

El sindicatu de Beatriz Quirós lleva tiempu denunciando que la LOE nun ye en realidá más qu'un remocique superficial del testu de la Llei de Calidá de la Enseñanza (LOCE) que nel so día presentare'l gobiernu del PP. Ente los argumentos colos que dfende eti paecer, SUATEA sorraya'l fechu de que la xuba presupuestaria na educación foi a parar a manes del sector priváu, el más beneficiáu cola xeneralización de la etapa d'Educación infantil non obligatoria de cero a trés años. El compromisu social por una escuela pública de calidá pa tol alumnáu, llaica y compensadora de desigualdaes, el compromiso social col profesoráu como elementu fundamental del procesu educativu, y sobremanera'l compromisu del Estáu pa que la financiación del sistema públicu d'enseñu llegue al 7% del Productu Interior Brutu son los exes de les demandes de la organización asturiana.