Representantes de los principales sindicatos d'educación afirmen que nun tienen comunicación con Riopedre pa falar sobre l'asturianu

Entamó ayeri n'Uviéu la primer xornada del seminariu "Llingua, Clase y Sociedá" alcuentru de filólogos y historiadores que va analizar el papel qu'ocupaben los idiomes nes rellaciones sociales a lo llargo del sieglu XX nel Estáu español.
Tres de les presentaciones, que corrieron a cargu del decanu de la Facultá d'Historia Octavio Montserrat, el profesor de filoloxía Xulio Viejo faló de lo novedoso de la iniciativa qu'intenta xunir los estudios de clase d'historiadores y los llingüísticos de los filólogos, xuniendo dos elementos mui presentes na historia d'Asturies como son el movimientu obreru y la llingua, y llamó l'atención de que nesti casu la iniciativa del seminariu, contrariamente a lo que suel pasar, saliere de los estudiantes, concretamente de Rafael Rodríguez Valdés, que foi l'impulsor de la idea. Otru de los responsables de la organización de les xornaes, Rubén Vega, destacó l'enfoque interdisciplinar del seminariu y el que fale d'un tema mui relevante y presente na sociedá pero que desgraciadamente da llugar a xuicios y opiniones mui rotundes basaos en prexuicios, cuando la realidá de les rellaciones ente llingua, clase y sociedá son muncho mas complexes.

Darréu entamó la primer mesa redonda. Centrada na cuestión del "Sindicalismu y enseñu del asturianu" nella participaron representantes de los trés sindicatos con más presencia na enseñanza asturiana, con Primitivo Abella (CC.OO.), Maximina Fernández (FETE -UXT) y Alberto Megido (SUATEA). La representante d'UXT fizo un repasu a los últimos 30 años del asturianu na educación, recordando dellos fitos importantes como l'apaición del famosu lema "bable nes escueles", la fundación de l'ALLA, la introducción del asturianu nos centros pilotu nel cursu 84-85 asina como'l sofitu de la UXT a la cooficialidá.

El representante de SUATEA, pela so parte, recordó que dende l'entamu del so sindicatu hai 25 años ya ta conseñada la demanda d'oficialidá nos sos estatutos fundacionales y recordó la necesidá de la creación de la especialidá de llingua asturiana, que calificó de "problema esclusivamente políticu", y que, mientres na enseñanza primaria les coses van meyorando, en secundaria e infantil la enseñanza del asturianu ye mínima o inesistente. Punxo'l casu del cursu d'infantil del IES Severo Ochoa en Xixón, onde'l 90% de los alumnos pidieron asturianu pero onde la conseyería nun mando al profesor, como tendría obligación, según el sindicalista, que tamién contó delles anécdotes personales de cuando entamó a poner clase a primeros de los 90. Alberto Megido recordó que los profesores de llingua taben daquella bastante mal consideraos nos mesmos centros, asegurando que se daben naquellos años situaciones en que los compañeros-y negaben el saludu.

Pela parte de CCOO, Primitivo Abella centró la so intervención en sorrayar como los centros concertaos y privaos faen de menos l'enseñu del asturianu, siendo que namás trés en tol país ufierten asturianu. Los ratios mínimos de 8 alumnos y de 15 en bachiller pa poder solicitar asturianu tamién merecieron la crítica de Primitivo Abella, que reconoció que l'usu del asturianu como llingua vehicular ye "otra asignatura pendiente".

Los trés representantes reclamaron la creación de la especialidá d'asturianu y afirmaron que-y tienen pidío al conseyeru Riopedre una reunión pa tratar esti tema. Sicasí, les rellaciones col responsable d'educación tan lloñe de ser normales, como reconocieron los sindicalistes. Los trés aseguraron que Riopedre lleva mas de dos años ensin recibilos, llegando a dase'l casu de que les reclamaciones de los sindicatos d'enseñanza sobre l'asturianu tienen que pasase a l'Academia de la Llingua pa qu'esta y-les apurra al conseyeru nes ocasiones qu'aconceyen los dos organismos.