RENFE tresmite a Política Llingüística la intención d’entamar a usar la toponimia oficial “nun curtiu plazu de tiempu”

Antón García, direutor xeneral de Política Llingüística, aconceyó esti miércoles n’Uviéu con Mariano Santiso, xerente del Área Norte Viaxeros de RENFE. L’usu de la toponimia oficial por parte de les empreses públiques RENFE y ADIF foi’l tema principal del alcuentru, con bon entendimientu nesti tema ente les dos partes.

Política Llingüística confirmó depués de la xunta que Santiso confió en que l’usu de los nomes de llugar tradicionales, únicos oficiales en 69 de los 78 conceyos del país, cola previsión de cumplir el procesu nos 9 restantes enantes del fin del 2022, “empiece a aplicase de manera integral y gradual nun curtiu plazu de tiempu”. Nestos momentos les infraestructures ferroviares asturianes empleguen la castellanizada, yá derogada; tamién na web y aplicaciones de merca de billetes.

La Xunta pola Defensa de la Llingua Asturiana (XDLA) yá treslladara n’avientu a RENFE y ADIF un ‘Informe sobre l’incumplimientu de la toponimia oficial na rede de ferrocarril d’Asturies’, nel qu’analiza los nomes oficiales de les 207 estaciones de ferrocarril asturianes. En momentu nengún recibió respuesta.

Na semeya, Santiso y García.