Rempuesta positiva a la Propuesta Abierta de la Xunta

Amás de la campaña d'acciones de protesta que ta faciendo dende va unes selmanes énte la política llingüística del Gobiernu asturianu, La Xunta Pola Defensa de la Llingua abrió un nuevu ámbitu de movilización al presentar a les organizaciones asturianistes de toa triba la so propuesta abierta, un documentu de mínimos alredor de la llingua asturiana que fai un anális históricu de los venticinco últimos años de reivindicación llingüística, concluyendo que tamos viendo "l'apueste postreru de los sectores llingüísticamente más reaccionarios de la sociedá asturiana por ganar d'un blincu pa tras tolo qu'hasta agora perdieren, y por aprovechar el marcu llegal ambiguu nel que s'alcuentra l'asturianu pa frenar dafechu un procesu que yá paecía que nun tenía torna". El documentu remata con un bloque de propuestes de protesta y movilización nel que se suxer pasar a "práctiques de resistencia civil non violenta, acordies cola situación na que tamos viviendo, multiplicando y descentralizando les acciones de denuncia, implicando a más xente y faciendo visible la inxusticia que tamos viviendo y la condena a muerte que-y quieren imponer a la llingua del nuestru pueblu".Tres un periodu en que les organizaciones convidaes a soscribir el documentu podíen facer reformes y aportar coses nueves na so redacción, a la fin esti sábadu, nel Auditoriu Príncipe Felipe, la Propuesta Abierta quedó validada coles firmes de los partíos políticos PAS, URAS, IX, Andecha Astur y IAS, y les organbizaciones Xinta Xeneral 25 de
mayu, T.C. El Garrapiellu y COSAL. Otres organizaciones como'l BIA tan pa firmar enseguida, y amás abrese agora un tiempu, hasta finales d'agostu y primeros de
setiembre en que se moverá'l documentu per toles organizaciones culturales, folklórico-musicales, grupos de teatru etc col enfotu de conseguir les más firmes que se puedan.