Remedios Menéndez Calvo ganó'l concursu de rellatos de cangas

La madrileña de familia de Cangas Remedios Menéndez Calvo (1975) ye la ganadora de IV Concursu de Rellatos Curtios en Llingua Asturiana "Conceyu de Cangas del Narcea" pol so trabayu "L.letra a l.letra" escritu n'asturianu occidental y que va facela merecedora de los 600 euros del premiu. L'autora, profesora de la facultá de Derechu de la Universidá d'Alcalá de Henares foi galardonada yá n'otres ediciones d'esti mesmu certame, foi tamién finalista del concursu de rellatos curtios de la editorial Alcumán nel 2003 y tien obra enxerto nel volume de rellatos compilatoriu "Cuéntame".


El rellatu "L'acabose" del escritor cangués Xosé María Rodríguez (1956), autor pioneru del Surdimientu y qu'espublizó l'añu pasáu la novela "Tiempos de Nublina" consiguió'l segundu premiu na convocatoria, dotáu con 300 euros, mientres que la tercer plaza nel certame, dotada con 180 euros, concedió-yla'l xuráu a Xuan Carlos Crespos Lanchas (Xixón 1970) pol so cuentu "La hestoria de la muyer qu'escaecio cómo llorar y lo qu'aconteció cuando recordó" con un tercer premio de 180 euros. L'autor tien espublizao cola editorial Trabe "Poemes raros (de sangre seco)" neto que collaboraciones en Lletres Asturianes, Lliteratura, Reciella Malory y La Ratonera.

Na estaya especial acutada pa los relatos escritos n'asturianu occidental el ganador, foi Ezequiel Cala Arias pol so cuentu "L.lobus d'anguano". Collaborador de la edición de Xixón del diariu La Nueva España y del selmanariu Les Noticies, Cala tamién tien conseguío premiu n'anteriores ediciones del concursu de Cangas.

La conceyala de Cultura, Mónica Díaz presidió'l xuráu, nel que tamién tuvieron Roberto González-Quevedo pola Academia de la Llingua Asturiana, l'escritor Xuan Bello, el responsable del Serviciu de Normalización Lingüística de Cangas del Narcea, Nacho González y la mayestra d'asturianu Mar Llano, sorrayando tolos miembros del xuráu l'alta calidá de los rellatos presentaos.