“Refuguen la oficialidá con un despreciu manifiestu al nuesu patrimoniu cultural contra toda evidencia científica”, censura Barbón

|
Adrián Barbón alderique d'orientación política 2021-2022

La Xunta Xeneral acoyó esti llunes la intervención del presidente Adrián Barbón qu’abre l’alderique d’orientación política xeneral correspondiente al añu llexislativu 2021-2022. Nun discursu de cuasi hora y cuartu, el socialista fixo referencia a la reforma estatutaria, censuró a los que “refuguen la oficialidá espresando un despreciu manifiestu al nuesu patrimoniu cultural contra toda evidencia científica” y defendió la so aprobación pa "evitar la desapaición del asturianu y del eonaviegu".

La cuestión del idioma sacóla en dos momentos diferentes, primero na estaya de cultura p’amosar el so “plasmu” pola postura que tán amosando les formaciones contraries a la oficialidá, esto ye PP, Ciudadanos y VOX, pa centrase llueu na reforma nel tramu final, momentu nel qu’emplegó l’asturianu –nesta ocasión nun usó’l gallego-asturiano como nel anterior alderique d’orientación política–. “Protéstase, por exemplu, que l’asturianu nun ye una llingua, que lo qu’esiste ye una axuntadura de variedaes dialeutales que nun tienen valor nengún. Otros, yá a la tremenda, dicen que ye una llingua inventada, artificial, que nun utiliza nin entiende naide. Yo pongo siempre l’exemplu de los mios güelos: agora m’entero de que los mios güelos foron inventores del asturianu”, entamó en castellanu.

“Entiendo, anque no lo comparta, qu’un partíu s’oponga a la oficialidá. Naide nun-yos obliga a tener que votala. Tán nel so derechu. Lo que me disgusta ye qu’esi refugu s’esprese –xubiendo’l tonu nesti momentu– con un despreciu manifiestu al nuesu patrimoniu cultural contra toda evidencia científica. Desprecien fondamente’l nuesu patrimoniu cultural. Eso sí que nun lo tolero”, siguió. Llueu recordó que “el castellanu, l’italianu, el gallegu o cualquier otra llingua vivieron procesos de normalización. Culquiera. Entovía me sorprende y apéname más constatar que dacuando eses mesmes crítiques les llancen dirixentes de dalgunos partíos que defenden la oficialidá y falen con arguyu de les sos llingües propies, por exemplu’l gallegu. Eso sí ye’l máximu esperpentu”.

Pa finar esta parte, aseguró que “temo que la esplicación d’esa aversión nun ye yá política, nin siquier un equivocáu cálculu eleutoral. Dexemos que perseveren nel error. Nel fondu lo que llate ye un complexu d’inferioridá”.

Yá centrándose nos aspeutos de cultura, refirióse a l’aprobación esti mesmu mes por parte de la Comisión d’Educación del Congresu de la iniciativa qu’encamienta al Gobiernu estatal a la creación de la especialidá docente de Llingua Asturiana y Gallego-asturiano. “El mio Executivu sofita esi plantegamientu. De fecho, hai unos días celebróse’l segundu esame de certificación de llingua asturiana, que nesta ocasión alcanzó per primer vez el nivel avanzáu”, espuso.

Referencia a la manifestación del 16-O

La parte final del discursu’l llavianés dedicóles a facer unes consideraciones, que principió afirmando que “el mio Gobierno ta pa defender los intereses d’Asturies siempre y énte cualquier Alministración o institución” y “pa impulsar les reformes que consideramos necesaries pa modernizar Asturies, en tolos órdenes. Ente elles incluyo la reforma del Estatutu”, que cumple 40 años, cola intención de facelo “de forma abierta, con plena disposición al diálogu y voluntá de consensu, como ellos nos enseñaron”, en referencia a los redautores del testu, que recibieron esti 2021 la Medaya d’Oru d’Asturies.

Nesti momentu Barbón camudó al asturianu, qu’emplegó per 1 minutu y 40 segundos, pa señalar que “Asturies quedó descolgada de la última fola de reformes estatutaries por razones sobre les qu'agora quiero más nun m’estender. La primer ronda de reuniones colos grupos parllamentarios (sacante la estrema derecha antiautonomista) dexó bien a les clares una coincidencia xeneral: toos coincidimos na conveniencia d'actualizar l'Estatutu. Prestaríame qu'esa coincidencia tuviere continuidá nun diálogu abiertu nel que cada fuerza collabore p'ameyorar la nuestra norma básica. Esa diba ser l'actitú más responsable, la más axeitada pa un oxetivu como'l que nos marquemos”.

El presidente confirmó que “el Gobiernu va mantener el so apoyu a la oficialidá del asturianu y del eonaviegu, la meyor manera d'evitar la desapaición de dambes llingües. Apelamos a la nuestra madurez autonómica pa dar esti pasu con serenidá, alloñaos del tremendismu apocalípticu qu'estiende la estrema derecha y que contaxa tanto”. Fixo darréu referencia al 16-O: “Va poco más d'una selmana, hubo una importante manifestación d’apoyu a la oficialidá equí n'Uviéu. En toles cróniques nun lleí nada que nun fuere la reivindicación, y créanme que nun m’equivoco, d'un derechu, nunca la esixencia d'imposiciones. Ési ye'l criteriu del mio Gobiernu. Reconocer el derechu a la oficialidá na reforma del Estatutu pa concretar depués el modelu, que va tener qu'adaptase a la nuestra realidá; que va tener qu’adaptase a les escueles, na Alministración o con nos medios públicos de comunicación”.

Pa finar rescampló que “cuarenta años depués de l'aprobación del Estatutu, les fuerces parllamentaries nun habríemos tener mieu a abrir esti debate, ensin zarrase en banda a les invitaciones al diálogu feches por esti Executivu. Ésa ye la verda”.

Mañana, les intervenciones de los voceros

L’alderique d’orientación política xeneral va siguir mañana, a les 9 hores, cola intervención de los voceros parllamentarios y les correspondientes répliques. La votación de les resoluciones va tener llugar el xueves, tamién dende les 9.

Na imaxe, Barbón esta mañana na Xunta Xeneral, onde llució una corbata azul con detalles de la Cruz de la Victoria. Semeya obra d'Armando Álvarez.

Contador Estadistiques