Refugada nel Congresu la enmienda de Foro pa dar financiación a l’ALLA

Los votos en contra de PP, UPyD y ERC valtiaron la enmienda de Foro a los Presupuestos Xenerales del Estáu que demandaba una partida de 143.000 pa l’ALLA. El diputáu asturianu Gaspar Llamazares astúvose na votación.

L’Academia de la Llingua Asturiana (ALLA), institución afeutada polos recortes na so financiación nacional, nun va recibir perres de procedencia estatal como l’Insitut d’Estudis Catalans y la Real Academia Galega (273.000 euros, caúna), y la Euskaltzandia (143.000 euros). Nin la enmienda presentada pol forista Enrique Álvarez Sostres, que reclamaba les mesmes perres que l’academia vasca, esto ye, 143.000 euros, nin la d’Izquierda Xunida, que pidía 75.000, salieron alantre.

La mayoría absoluta del PP impidió que les dos enmiendes a los Presupuestos Xenerales del Estáu presentaes nel Congresu –y toles demás, a esceición d’una d’UPyD– nun salieran alantre. Sicasí, llama l’atención, nel casu de la propuesta de Foro, el refugu d’Esquerra Republicana de Catalunya (ERC) y l’astención de Gaspar Llamazares, más cuando tolos sos compañeros d’Izquierda Xunida votaron a favor. El PSOE, CiU y el restu de formaciones del grupu mistu, mostráronse favoratibles al pidimientu.

La decisión de Llamazares tuvo una repercusión amplia nes redes sociales, sobre manera en Twitter, onde’l políticu asturianu tien una cuenta activa. Dellos internautes criticaron la so posición y Llamazares defendióse señalando que sí votó a favor de la so propuesta, pa depués apuntar que la so astención foi “un error”. Tamién tuvo que dar esplicaciones el diputáu d’ERC Joan Tardà, que calificó de “enquivocación” la so oposición a la enmienda de Foro.