Refuga ecoloxista a la térmica de La Perea

La Coordinadora Ecoloxista Asturiana presentó un escritu de suxerencies al Ministeriu de Mediu Ambiente en que manifiesta la so refuga a la central térmica de ciclu combináu que la empresa ENDESA quier asitiar en La Perea.

L'impactu na calidá del aire en Mieres ye'l principal argumentu del grupu conservacionista pa refugar la térmica, y anque reconoz que'l gas ye menos contaminante que'l carbón pide se contestualice la cuestión centrándose nel llugar onde van facese les emisiones a l'atmósfera, que diz que yá carez un dañu ambiental grande por culpa de la térmica actual d'Hunosa. El monóxidu de carbonu (CO), el dióxidu de carbonu (CO2), que contribuye al cambéu climáticu, los óxidos de nitróxenu (NOx) y el dióxidu d'azufre (SO2) son los principales axentes contaminantes que se vierten a l'atmósfera de Mieres, ello amestao a los posibles escapes del gas metanu, que tienen un potencial de calecimientu atmosféricu a 20 años 56 vegaes mayor que'l de la mesma cantidá de CO2.

L'impactu al agua, col emplegu pola central de lo del Ríu Caudal tamién apaez nel escritu de los ecoloxistes como ún de los impactos serios sobre'l mediu ambiente local. Hasta 460 llitros per segundu va poder tomar una térmica d'estes característiques del Caudal, devolviéndoles a una temperatura más alta que la normal del ríu, lo que pue facer, ensin contar vertíos y escapes, que se dañe un ríu nel que se lleven invertíes bien de perres pa llograr la so recuperación ambiental tres de la crisis de la minería. La construcción d'un gasoductu y una llinia eléctrica fechos a costafecha pa esta planta tamién diben suponer según la Coordinadora, un impactu que nun se pue escaecer nun llugar onde amás hai un poblamientu mui espardíu que nun dexa pasiellos pa inxertar nellos estes llinies.