Recupérase la Escuela de Branu d’Asturianía, que va formar a 23 descendientes d'emigrantes

23 mozos y moces procedentes de 19 comunidaes asturianes repartíes pel mundu participen dende esti llunes n’Uviéu na Escuela de Branu d’Asturianía. L’oxetivu ye averar la cultura y tradiciones asturianes a estos fíos y nietos d’emigrantes.

Ésta ye la cuarta promoción de la Escuela de Branu d’Asturianía, que l’añu pasáu, baxo gobiernu de Foro, nun se celebró. “Convócase cola finalidá de formar a monitores de cultura asturiana, na especialidá de gaita y baille, favorecer el conocimientu de la cultura y les tradiciones autóctones, y reforciar los vínculos que xunen a los emigrantes pertenecientes a centros y casas d’Asturies repartíos pel mundu”, amás de p’algamar que “les xeneraciones nueves conozan la realidá de l’Asturies actual y convivan con mozos d’otros coleutivos, creando una rede qu’estreche los llazos cola tierra de nacencia de los sos padres y güelos”.  Asina, nel Institutu Adolfo Posada reciben, a lo llargo del tol mes, clases de cultura y sociedá, llingua y lliteratura asturiana, folclór, percusión, gaita y baille tradicional en xornaes d’ocho hores llectives.

Nesta ocasión el númberu de participantes asciende a 23, de los que 12 son mozos y 11, moces. La mayor parte d’ellos, 17, proceden d’América Llatina, en concreto de los centros arxentinos de Tucumán, Rosario, Comodoro-Rivadavia, Mar del Plata, Mendoza, Buenos Aires, Santa Fe, Paraná y La Plata (12); de los chilenos de San Fernando, Valparaíso y Santiago (3); de la Ciudad de México (1); y de la población brasileña de São Paulo (1). Tamién tienen representación los centros de Bruxeles, Gasteiz, Logroño, Valladolid y Barcelona. Según los datos aportaos pol Gobiernu, dende la so creación nel añu 2002 pasaron poles trés promociones anteriores de la Escuela de Branu d’Asturianía 73 monitores de 32 centros que, gracies al so llabor, provocaron un aumentu del númberu bandes de gaites y grupos de baille nes sos comunidaes d’orixe y algamaron la implicación de mozos y moces del llugar nestos coleutivos.