Reculen los dominios ".es"

De la que l'alministración estatal fizo apueste pa que toles empreses y entidaes españoles emplegaren el dominiu identitariu .es nes sos direcciones d'internet, naide nun pensaba que la cosa diba sali-yos tan mal. Ello ye que, arriendes del preciu (72 euros l'alta y 48 de renovación añal), les restricciones y requisitos que se piden pa tener un dominiu .es echaron p'atrás a bien de persones y firmes interesaes, colo que el dominiu español ocupa anguaño'l puestu númberu 40 na llista de dominios más emplegaos con 36.539 webs rexistraes, bien perbaxo de lo que podía esperase. Por poner dellos casos, el .de alemán axunta 5 millones y mediu de webs, mientres que'l .nl holandés abandera otres 617.000. Anque l'alministración fai esfuerzos por popularizar el dominiu, lo cierto ye que nel 2002, el .es reculó como nunca: 527 altes en mayu, 296 en xunu y namás que 80 en xunetu.Una curiosidá. El dominiu de la Samoa Americana, ".as" qu'empleguen bien de persones, empreses y entidaes asturianes como rexistru identitariu na rede, tien 28.614 webs daes d'alta.