'Recorridos' más d'un cientu de semeyes d'artistes españoles

Un total de 110 instantánees de los fotógrafos Paco Gómez, Helena Almedia, Chema Madoz, Carlos Pérez Siquier, Miguel Trillo y Xavier Ribas, pertenecientes a la Fundación Foto Colectania, van permanecer espuestes na sala d'esposiciones del Bancu Herrero n'Uviéu dende ayeri hasta'l próximu 6 de xineru. Baxo'l títulu de 'Recorridos', la esposición retrata la trayectoria d'estos seis artistes gráficos españoles.

En rueda de prensa, la directora de Promoción Cultural y Política Llingüística del Principáu d'Asturies, Consuelo Vega, declaró qu'actividaes espositives como ésta "arrriquecen" la vida cultural d'Uviéu y Asturies. Vega también afirmó que nel Principáu existe un apreciu social, amás d'una sensibilidá pa disfrutar d'un arte como la fotografía.

Pal director de la Fundación Foto Colectania, Pepe Font de Mora, esta muestra busca representar a cada autor dende los sos entamos, y destacó de los artistes presentes na muestra'l so carácter personal a la hroa de facer les semeyes. "La nuesa colección tenta de recoyer munches obres, pero sobre too que'l públicu entienda'l trabayu de los autores", manifestó de Mora.

Según Carlos Pérez Siquier, ún de los artistes presentes na muestra amás de Premiu Nacional de Fotografía nel 2003, declaró que la fotografía dientro del espaciu nacional, nun tuvo les puertes abiertes, pero gracies a esposiciones como la que dende güei se pue ver na sala d'esposiciones del Bancu Herrero, eses puertes tán cada vez más abiertes.

La esposición 'Recorridos' forma parte d'un conveniu de collaboración firmáu nel 2002 ente'l Bancu Herrero, Bancu Sabadell y Principáu d'Asturies, pal espardimientu de la cultura.

Esti alcuerdu de collaboración ente iniciativa privada y pública dio como frutu un total de 16 muestres con más de 1.000 díes d'ufierta espositiva. "Lo qu'entamó siendo un deséu acabó por ser una franca y beneficiosa amistá", declaró'l director de la Fundación Bancu Sabadell, Miguel Molins, en referencia al alcuerdu suscritu col Principaú. Molins también manifestó la voluntá de la entidá financiera de renovar por otros cinco años más la collaboración col Gobiernu asturianu. "Quiero renovar mui pronto'l conveniu pa siguir trabayando y fomentar la cultura n'Asturies", afirmó. Sobre 'Recorridos", el director de la Fundación Banco Sabadell, declaró qu'ésta ye la primer gran esposición centrada esclusivamente na fotografía, un campu artísticu destináu a ocupar un llugar preeminente nel mundiu de les artes.