Reconocimientu a Víctor Manuel en casa: “Nun ye difícil salir d’Asturies, lo que ye más difícil ye qu’Asturies salga de ti”

L’Espacio Cultural 19 10, asitiáu na Casa’l Pueblu de Mieres, reconoció a Víctor Manuel col so primer gallardón “a la promoción de la cultura y los valores democráticos”. L’actu contó cola presencia del presidente Adrián Barbón, que reivindicó “más cultura y más democracia”.

El socialista rescampló na so intervención el doble aciertu d’escoyer al cantante mierenses como premiáu y que’l gallardón valore la rellación de la cultura de los valores democráticos “porque son de les primeres coses qu’ataquen aquellos que quieren terminar cola democracia, y son yá numberosos los gobiernos, n’España y nel mundu, que faen del ataque cultural una de les sos señes d’identidá”. D’ehí la so reivindicación, “güei más que nunca”.

Refirióse a Víctor Manuel como humilde “hasta la timidez” y como “ún de los nuestros, siempre dispuestu a volver a casa, anque nunca marchara d’ella”, y la so asturianía. “Ye difícil atopar identificación asemeyada: Víctor Manuel representa, significa Asturies per ónde quiera que va”, apuntó’l presidente, que tamién emponderó l’usu de la Casa’l Pueblu como espaciu cultural “abiertu al patrimoniu, la cultura, al conxuntu de Mieres y de les cuenques”.

Pela so parte, l’artista dio a los presentes, qu’enllenaron l’aforu del llugar, un discursu nel qu’intercaló pallabres y partes cantaes, llegando a emocionase en dalgunos momentos. Nel mesmu recordó cuando dixo “poco más de 60 años atrás” en casa “que quería ser cantante”, ensin atopar resistencia, “y fui a Madrid”, un llugar que “per años pensé que diba ser provisional, y esa provisionalidá tresformó en poderosa señardá, en canciones que falaben d’Asturies y de coses comunes a muncha xente”, apuntó en castellanu.

Manuel Llaneza

“Sé que nel 1910 foi l’añu de fundación del SOMA, anque nun lo recordaba y entrugué”, dixo depués, pa siguir apuntando que de nenu “yo nun conocía quién fora Manuel Llaneza nin nada sabía d’aquella Guerra Civil de la que falaben en voz baxa. Too eso comencé a sabelo lleendo la historia de ‘El movimiento obrero en Asturias’ de David Ruiz”, llectura de la que salió ‘Carta de un minero a Manuel Llaneza’, censurada nel 1970, con melodía nesi momentu aprovechada pa ‘María Coraje’, y grabada per primer vegada en México nel 1972.

D’ehí enllazó un discursu que finó dando les gracies “por alcordavos de min. Yo nun m’escaezo de vosotros. A estes altures de la vida yá va munchos años que sé que nun ye mui difícil salir d’Asturies, lo que ye más difícil ye qu’Asturies salga de ti”.

Na semeya, Víctor Manuel recibe l'aplausu del públicu, con Barbón y otres autoridaes na primer filera.