Reactívase la EPA col oxetivu de da-y voz a les empreses con visión de país

|
Logu EPA

Nes últimes selmanes, en rellación col alderique alredor la oficialidá presente na sociedá asturiana, produxéronse contautos ente los impulsores d’Empresarios y Profesionales por Asturies (EPA) pa reactivar el coleutivu. Ésti creóse nel 1997 y tuvo activu mientres dellos años.

Yá se dieron los primeros pasos pa la recuperación d’esta iniciativa qu’axuntaba a aquellos empresarios que queríen trabayar “pol fomentu del usu de la llingua asturiana nel ámbitu de les rellaiciones empresariales y profesionales”. Frutu d’aquella xunión nació una campaña, que tuvo amplia repercusión nel so tiempu, con pegadielles coles que los comercios amosaben que l’asturianu yera bienllegáu dientro les sos puertes.

La intención de los promotores d’esta reactivación de la EPA ye celebrar nes selmanes próximes conceyos pa presentrar el so proyeutu a empresarios y profesionales de toa Asturies. La idea de los promotores ye nun centrase namái nel tema llingüísticu, sinón amplialu y tener tamién en cuenta la idea de país, entendiendo la cultura y la identidá como un elementu d'innovación y reactivación económica y como un activu na cultura empresarial del sieglu XXI.

Contador Estadistiques