Reacciones escontra Asensio Cobián

El colectivu Xente Gai Astur (Xega) reclamó-y ayeri a la dirección a la dirección del Partíu Popular que desautorice oficialmente al alcalde de Villaviciosa Asensio Martínez Cobián, que l'otru día dixere en declaracionbes a la prensa sobre la llegalización de les bodes ente persones del mesmu sexu que nun-y prestaba la idea de casar "machos con machos" porque-y abultaba "poco menos qu'una aberración". L'asociación de defensa de los derechos de los homosexuales retrucó a estes declaraciones con un comunicáu en que calificaba de "grave muestra d'homofobia" les declaraciones del alcalde de Villaviciosa. Pa XEGA les declaraciones de Cobián son propies d'un réxime facista, sorrayando que nun cabe facer nun estáu democráticu Sharies islamistes o católiques". El colectivu llamó al PP asturianu a siguir col exemplu que dieren los sos compañeros de partíu catalanes, qu'espulsaron del partíu al alcalde popular del conceyu de Potons por facer unes declaraciones asemeyaes a les qu'emitió anteayeri'l rexidor de Maliayo.

Per otra parte, la organización política Andecha Astur pidió-y públicamente al Alcalde de Villaviciosa que se retracte de les sos declaraciones y, que en casu contrariu dexe'l cargu. Andecha sorraya qu'Asensio Martínez Cobián "ye l'acalde de tolos y toles maliayeses y, mal que-y pese, tamién de les pareyes gais" remembrando que ta obligáu a cumplir la llei y casar pareyes de persones del mesmu sexu. La organización política xorrasca nes declaraciones de Cobián, que se declaraba dimpuestu a casar muyeres con muyeres pero non "machos con machos" entrugándose si la posibilidá de casar llesbianes-y dará "morbu al señor Alcalde". La organización nacionalista píde-y a Asensio Martínez Cobián que "dexe de facer el ridículo y siga l'exemplu de la mayor parte de los sos compañeros del Partíu Popular, que nun van poner torga nenguna a les xuniones ente pareyes homosexuales".