Reacciones énte l’encarcelamientu de Cándido y Morala

Dempués d'un día en que la plantiya del astilleru Naval Xixón protagonizó un paru en protesta pol encarcelamientu de los sindicalistes Cándido González Carnero y Juan Manuel Martínez Morala, un báramu de comunicaos y declaraciones pidió la llibertá y l'absolución pa los sindicalistes de CSI condenaos a trés años de cárcele polos estrozos causaos nes movilizaciones de Naval Xixón .

Asina, la estaya sindical de CC.OO denunció la "persecución" que diz que sufren los sindicalistes cuando faen usu de los sos derechos constitucionales en defensa de los derechos llaborales y del so sector". Los responsables de la federación de metal y minería de CC.OO afirmaron que diben sofitar toles iniciatives d'amparu pa los dos sindicalistes. Dende cerca del astilleru de Naval Xixón, el Comité d'Empresa de Felguera Calderería Pesada (El Tallerón) declaró un paru de 24 hores pa esti martes y una concentración énte'l xulgáu en señal de protesta.

Dende l'ámbitu políticu, Izquierda Xunida denunció la situación de Cándido y Morala y pidió l'indultu pa los dos históricos de la Corriente Sindical d'Izquierda, asegurando que la situación a la que llegaron débese al Códigu Penal aprobáu pol PP baxo'l gobiernu d'Aznar.

Pela so parte, Izquierda Asturiana (IAS) calificó les detenciones d'atropellu a les llibertaes y criticó también al Ayuntamientu de Xixón, que dixo que tien que ver col procesu y especialmente contra'l Delegáu del Gobiernu Antonio Trevín, qu'asegura que ta llegando a "cotes represives increíbles."

Los simpatizantes de Cándido y Morala intentaron allegase ayeri a la Casa de Cultura d'Avilés aprovechando la presencia del director de cine Woody Allen pa facer presente la so reivindicación de llibertá pa los sindicalistes y intentaron facé-y llegar al cineasta, que daba un pase de la so última película, documentación sobre'l casu.