Ramos corrada preséntanos la Historia de la Lliteratura

El 18 d'avientu l'Academia de la Llingua presentó la Historia de la Lliteratura Asturiana, obra enciclopédica que va valir d'encontu pa la investigación, divulgación y conocimientu de la lliteratura n'asturianu. Un mes depués de l'apaición de la obra, que ta teniendo una pergrande aceptación del públicu, el profesor Miguel Ramos Corrada, coordinador de la obra, fala con Xandru Osuna nel programa de Radio "El Xorrecer d'Asturies" que s'emite tolos vienres na emisora d'Uviéu Radio Vetusta (106,9 FM). Miguel Ramos Corrada, una de les másimes autoridaes en lliteratura asturiana, yá esplicare'l día de la presentación que'l llibru yera'l resultáu de mas dos años de trabayu nos que, aparte de facer la cadarma de la obra y escribir los capítulos dedicaos al Barrocu, Romanticismu y Modernismu, tuvo de coordinar un equipu d'especialistes n'estayes concretes que collaboraron pa facer dellos separtaos. La llista de collaboradores d'esta Historia de la Lliteratura inclúi a Xosé Lluís García Arias pa la lliteratura medieval, Marta Mori pa la lliteratura del XVIII, Xosé Ramón Iglesias pa la segunda metada del XIX y Begoña Díaz González pa la lliteratura de posguerra, un periodu abegosu y difícil, como lu definió'l mesmu Ramos Corrada. Pela so parte, l'estudiu del surdimientu corrió al cargu d'Ánxel Álvarez Llano pa la prosa, Xosé Bolado pa la poesía y el teatru, Lluís Álvarez pal xéneru ensayísticu. La presidenta de l'Academia Ana Cano González y Antonio Fernández Insuela trabayaron sobre la lliteratura tradicional de tresmisión oral y Xosé Miguel Suárez encargose d'una parte dedicada a la lliteratura eonaviega.