Ramón Rodríguez va siguir al frente de la direición del RIDEA

|
Ramón Rodríguez Álvarez, Marta Pérez Toral y Ramón d'Andrés RIDEA y SFA

Candidatu únicu, el de San Cucao resultó reelixíu per otros cincos años con 26 votos favoratibles de los 27 emitíos.

El Conseyu Xeneral del Real Instituto de Estudios Asturianos (RIDEA) alcordó na tarde d'ayeri dar el preste a un mandatu nuevu de Ramón Rodríguez Álvarez, que nel 2013 accedió al cargu en sustitución d'Ignacio Ruiz de la Peña. El direutor tamién de la Biblioteca de la Universidá d'Uviéu abandonará'l cargu nel 2023, yá que los estatutos de la institución marquen que namái pue haber una reeleición.

Dende'l momentu de la votación, Rodríguez va contar con 30 díes pa tomar posesión. Tamién ha d'escoyer un subdireutor, que deber ser ratificáu pol Conseyu Xeneral.

Recibimientu de Pérez de Castro

El 3 de mayu, a les 19.30 hores, va ser recibida como miembru de númberu permanente del RIDEA Ramona Pérez de Castro. La profesora d'Historia del Derechu y les Instituciones na Universidá d'Uviéu va pronunciar un discursu d'ingresu que va tratar sobre 'El ordenamiento del Honor del Suarón, la Tierra de Ribadeo y el Concejo de Castropol durante las edades Media y Moderna'.

Na semeya, Ramón Rodríguez Álvarez, a la izquierda, xunto con Marta Pérez Toral y Ramón d'Andrés esti mesmu mes enantes d'una charra del ciclu 'Palabres d'Asturies, testigos d'historia' entamáu pol RIDEA en collaboración col Seminariu de Filoloxía Asturiana de la Universidá d'Uviéu.

Contador Estadistiques