Ramón d'Andrés, posible director de Política Llingüística

La incógnita más
importante que queda por despeyar pal asturianismu na composición del executivu
asturianu, el cargu de la oficina de política llingüística,
podría despeyase d'equí a dientro poco. Va tiempu que vien falándose d'una riestra de nomes, y en toles papeletes salíen siempres los d'Adolfo Camilo Díaz, Ramón d'Andrés o Xosé Antón González Riaño, ente otros.

Los dirixentes d'IX-BPA comprometiérense delles vegaes a tener resuelta la designación de director d'esta Oficina pal més d'ochobre, que yá ta más qu'amediáu, colo que tamos escosando'l teóricu plazu pa despeyar la incógnita. Ello ye que'l nome que más se siente nesta recta final del procesu ye'l de Ramón d'Andrés, al que fontes del Bloque por Asturies yá dan por seguru nel cargu de Política Llingüística. Sicasí, el procesu nun ta peslláu, como reconoció'l mesmu d'Andrés a les entrugues d'Asturies.com. El profesor de la Facultá de Filoloxía y Académicu de la Llingua Asturiana reconoció qu'esisten contactos nesti sentíu, pero quixo dexar bien claro qu'a día de güei nun hai nada definitivo.