Ramón d'Andrés acepta'l cargu en Política Llingüística

El procesu pa nomar el Director de
la oficina de Política Llingüística yá ta
cásique peslláu. El profesor Ramón d'Andrés confirmó a Asturies.com la so voluntá d'aceptar el
cargu pero la entrada efectiva de d'Andrés a la oficina ta por
concretase nel planu llegal, y ello pue llevar entovía un tiempu hasta que llegue al Conseyu de Gobiernu que tendrá d'aprebalo.
Ello ye qu'anque d'Andrés acepta'l cargu, entovía queden por
pesllar los conteníos que van desarrollase dende la
Oficina. Xente allegao a d'Andrés comentó que'l profesor y
académicu nunca nun diba aceptar un cargu vaciu y ensin definir, y eso ye precísamente lo que ta tratándose nesti
momentu. De momentu, como preba de la so voluntá d'aceptar el nomamientu, el profesor yá se despidió de los sos alumnos na Facultá
de Filoloxía con vistes a poder facese cargu del nuevu puestu nel
executivu asturianu.



Ramón d'Andrés nació en Madrid en 1959. Fíu del
conocíu escritor n'asturianu Manuel d'Andrés
Fernández"Mánfer de la Llera" d'Andrés ye Doctor
en Filoloxía Hispánica pola Universidá d'Uviéu.
Profesor de Llingua Asturiana na Escuela de Maxisteriu ente 1985 y 1998,
anguaño ye profesor titular na Facultá de Filoloxía de
Universidá d'Uviéu. Académicu de númberu de
l'Academia de la Llingua Asturiana, foi secretariu d'esta entidá hasta
que les diferiencies cola llinia d'actuación de la dirección de
l'Alla lleváronlu a dexar les sos responsabilidaes más directes
pa con esta institución, siendo públiques les sos discrepancies
cola Academia, de la que sigue siendo miembru.



Ramón d'Andrés ye autor d'una bibliografía bayurosa sobre cuestiones
filolóxiques, bien de vegaes con llibros de calter divulgativu y empobinaos a un
públicu ampliu, como "Cuestiones d'Asturianu Normativu"
o el "Diccionariu temáticu asturianu" anque la so obra
más prestixosa ye la conocía "Llingua y xuiciu : Sobre
delles cuestiones básiques del debate llingüísticu
n'Asturies" cola qu'algamó'l premiu d'ensayu Fuertes Acevedo en
1.998. La so abondante collaboración cola prensa entamó cuando
d'Andrés se fizo cargu de la sección n'asturianu "Alitar
Asturies" nel periódicu El Comercio, y collaboró col
selmanariu Les Noticies y con Asturies.com cola so columna "Bilordios
Filolóxicos" que trataba cuestiones divulgatives sobre l'usu
correctu del idioma. La postrer entrega de "Bilordios
Filolóxicos" espublizóse esti mes de setiembre, pero
d'Andrés nun dixo qu'esto supunxere la fin de la serie. Ye de suponer
que cola nueva responsabilidá en gobiernu tardemos en ver más
d'estos"bilordios".