Ramón Lluis Bande va poner el ramu a los alcuentros lliterarios de Corvera

Esti martes, de 11.30 a 12.30 hores, Ramón Lluis Bande va tar presente na Biblioteca de Les Vegues. L’escritor va pesllar l’eventu ‘Verano Lliterariu’ que traxo a Corvera a una docena d’autores a lo llargo d’agostu.

El creador de ‘Un viaxe distintu’ y ‘Historia d'un árbol’, dambos llibros espublizaos por Ámbitu, va tener un contautu mañana en Les Vegues colos sos llectores y siguidores mozos no que va ser l’actividá cabera de ‘Veranu Lliterariu’. Enantes del xixonés, pasaren per Corvera pa participar nesti alcuentru d’escritores Sidoro Villa, Chechu García, María Luz Pontón, Inaciu Galán, Jorge Fernández, Xulio Berros, Berto García, Antón García, Iris Díaz Trancho, Cristina Muñiz y Severino Antuña. L’accesu a esti eventu ye de baldre.

‘Veranu Lliterariu’, actividá entamada pola Casa de la Llingua y el Conceyu de Corvera, tien l’oxetivu de “favorecer el contautu ente autores y llectores, amás de dar a conocer dello de la producción lliteraria n'asturianu dirixida a los rapacinos”, señalen dende la organización, que fai una valoración positiva d’esta primer edición de los alcuentros lliterarios y adelanta que l’añu qu’entra van tener continuidá.