Ramón d’Andrés garra la presidencia de la Fundación Caveda y Nava

La Fundación Caveda y Nava tien presidente nuevu. El profesor de Filoloxía na Universidá d'Uviéu, Ramón d’Andrés, sustitúi a Inaciu Iglesias al frente de la entidá que tien como oxetivu buscar un consensu pa da-y un futuru a les llingües d’Asturies.
 
Iglesias, que va ser candidatu a l’alcaldía de Noreña por Foro Asturias Ciudadano (FAC), yera presidente de la Fundación Caveda y Nava dende l’añu 2006, cuando sustituyó nel cargu a Etelvino Fernández López. Na reunión última del patronatu de la Fundación produzose la salida d’Iglesias y la entrada de D’Andres a la presidencia, cambiu que nun foi únicu, puesto que l’economista y ex presidente del Uviéu, Manuel Lafuente pasó a ocupar el cargu de secretariu qu’hasta la fecha llevaba José Rogelio Álvarez Fernández. Mantiénse como vicepresidenta, Berta Piñán.
 
Ún de los primeros llabores de D’Andrés al frente de la Fundación va ser l’entamu d’una ronda d’entrevistes colos candidatos de los partíos políticos que se presenten a les eleiciones “al envís de tresmiti-yos el el nuestru mensaxe alredor de la llingua asturiana: cumplimientu de la llei y necesidá d'un status de cooficialidá algamáu por consensu, planificación gradual y respetu a la llibre opción llingüística”, señala’l presidente nuevu. La entidá ta preparado un pequeñu cartafueyu esplicativu pa entrega-y a los políticos qu’acuden a les eleiciones del 22 de mayu.