Rajoy retira la Llei del Albuertu de Ruiz-Gallardón

El presidente del Gobiernu estatal, Mariano Rajoy, anunció na mañana del martes la retirada del anteproyeutu de la Llei del Albuertu encargáu a Alberto Ruiz-Gallardón argumentando una “falta de consensu”. Namái va modificase la necesidá del consentimientu paternu pa les menores.

El refugu fuerte de la sociedá y d’un sector importante del PP lleva a Rajoy a cargase l’anteproyeutu de la Llei Orgánica de Proteición del Concebíu y los Derechos de la Embarazada redautada pol Ministeriu de Xusticia que n’avientu aprobara en primer vuelta’l Conseyu de Ministros. Ésta pretendía reformar la norma vixente del 2010 tornando a la situación de décades atrás, derogando’l sistema actual de plazos, endureciendo’l sistema de supuestos que tuviera vixente dende’l 1985 hasta la reforma última, o poniendo pegues al albuertu por malformación del fetu.

Rajoy, por contra, sí confirmó la modificación de la llei actual no que se refier a la situación de les menores, que tendrán que contar con consentimientu paternu pa poder albortar. D’igual forma, anunció qu’apostará por un Plan de Proteición de la Familia que s’asoleyará enantes de finales d’añu. El ministru de Xusticia, Alberto Ruiz-Gallardón, señaló que mañana comentará los detalles d’esti cambiu de plategamientu del Gobiernu estatal na sesión de control prevista nel Congresu.