Rajoy diz énte'l xuez desconocer los asuntos económicos del so partíu

Declaró como testigu nel xuiciu del 'Casu Gürtel'. Ye la primer vegada qu'un presidente del Estáu tien qu'acudir a un tribunal.

Mariano Rajoy acudió esta mañana a l'Audiencia Nacional pa participar como testigu del xuiciu del 'Casu Gürtel'. En too momentu, el presidente del PP y del Gobiernu estatal escudóse en que desconocía los asuntos económicos del so partíu pa nun aportar datos nuevos al procesu.

Asina, negó la esistencia d'una 'caxa B' na contabilidá del Partido Popular (PP) o qu'empresarios dieren donativos a la formación, y afirmó qu'enxamás cobró sobresueldos. Sobre los mensaxe de móvil unviaos a José Luis Bárcenas, ex ayalgueru del PP, depués de que se conocieren les sos cuentes en Suiza, Rajoy tiró balones fuera.