Rajoy anuncia l’actualización de les pensiones, el fin de les pontes festives y el frenu al usu abusivu del paru

Mariano Rajoy, na so intervención nel Debate d’Investidura nel Congresu, señaló que va actualizar les pensiones, menguar les pontes festives y frenar l’usu abusivu del paru. Enrique Álvarez-Sostres ratificó’l so apoyu al llíder popular.
 
La persona que va ocupar la presidencia del Estáu nesta llexislatura señaló que la llucha contra'l desempléu va ser la prioridá del so Gobiernu porque'l númberu de paraos supera yá los 5,4 millones nel Estáu, lo qu'asitia la tasa de paru al cantu del 23 por cientu, al tiempu que se comprometió a reducir el déficit en 16.500 millones nel 2012. Nesti marcu, Rajoy señaló que'l so "únicu compromisu" d'aumentu de gastu va ser actualizar les pensiones a partir del 1 de xineru del 2012, dando asina cumplimientu a ún de los sos grandes compromisos eleutorales.
 
El popular tamién anunció que cuenta "suprimir" les prexubilaciones "nun siendo circunstancies bien esceicionales", y poner frenu a la “práutica abusiva" que supón facer de la prestación por desemplegu nos años últimos de la vida llaboral un "mecanismu de prexubilación tapada". Nesta llinia, calcó en que va proponese a "averar la edá real de xubilación a la edá llegal", pa garantizar el derechu a la xubilación y el poder adquisitivu de los pensionistes. Rajoy remarcó que'l so Gobiernu va ser consciente de la necesidá de garantizar la sostenibilidá del sistema de pensiones, "más tovía teniendo en cuenta la cayida de l'afiliación y la reducción de recursos que güei sufre'l nuesu sistema de Seguridá Social". Por ello, va trabayar pa reforzar los instrumentos pa facer efectivos los principios de suficiencia y de solidaridá, reordenar el tratamientu fiscal de les pensiones y potenciar los sistemes complementarios a la Seguridá Social.
 
Per otru llau, comprometióse a "racionalizar" el calendariu llaboral pa reducir les pontes festives, treslladando les fiestes al llunes más cercanu, "cola escepción d'aquelles feches de mayor raigañu social". Rajoy xustificó esta midida, reclamada pola patronal, pa fomentar la eficiencia del mercáu de trabayu faciendo compatibles los derechos de los trabayadores cola competitividá de les empreses.
 
Ensin contraprestaciones
 
El diputáu de Foro de Ciudadanos nel Congresu, Enrique Álvarez Sostres, confirmó que va votar favor de la investidura de Rajoy como presidente del Gobiernu pese a que llamentó qu'esi apoyu a la estabilidá presupuestaria que demandó'l candidatu del PP nun lo apliquen los populares n'Asturies. En declaraciones na Cámara baxa, Álvarez Sostres destacó que Rajoy aludiera al fin del so discursu a una cuestión prioritaria pa Foro, como ye la demanda de que nun haya asimetríes nel Estáu y que nun haya territorios distintes d’otros.
 
Tocantes a les midíes económiques y la estabilidá presupuestaria, contrastó los compromisos de Rajoy cola falta d'apoyu del PP al programa económicu de Foro n'Asturies. En too casu, entiende que nel Congresu la política nacional ta supeditada a la estatal: "Yo voi apoyar la investidura ensin contraprestaciones previes", atayó.