Rafael Palacios condenó les declaraciones de Javier Fernández sobre la reforma l’estatutu

El representante del Bloque por Asturies y secretariu de Cooperación del Gobiernu Asturianu declaró a Asturies.com en rellación coles declaraciones del secretariu de los socialistes asturianos a Radio Nacional d'España sobre la reforma del estatutu d'autonomía asturianu que-producíen una "fonda tristura".

Javier Fernández declarare que la reforma nun yera un asuntu que-y esmoleciere y sentenció que'l reconocimientu de la oficialidá na llei Orgánica de la Comunidá asturiana nun pasaba pelos planes de la FSA en cuantes que ye una midida que diba suponer "obligar a falar asturianu a los que nun queríen". Pa Rafael Palacios les opiniones de Javier Fernández demuestren que l'actitú de la FSA - PSOE ye la de "zarrar toles puertes nel tema de la reforma estatutaria, sobremanera na cuestión de la llingua saliéndose yá d'antemano d'un marcu de diálogu y de consensu" dalgo que-y abulta una "decisión sectaria y irresponsable de la que naide ta valorando les consecuencies". La crítica de Palacios espurrióse tamién al PP, que declarare yá delles vegaes al traviés del so dirixente Ovidio Sánchez que nun diba a entrar a debatir la reforma estatutaria d'Asturies mientres nun s'iguare la situación del estatutu catalán. Pal dirixente del BA, lloñe de les declaraciones públiques al favor de la llingua asturiana de dellos dirixentes populares "ye evidente que'l PP nun tien interes nengún en tolo que sía identida y reconocimientu d'Asturies".

Palacios declarose escépticu a la hora de valorar l'anuncia de Fernández de que la reforma estatutaria podía trancase d'equí a la vuelta d'ún añu. El dirixente del BA dixo que nun sabía mui bien como valorar esa declaración en cuantes que camienta que "nin socialistes nin populares trabayen cola voluntá de qu'ello sía posible, y abúltame que con ello namás tan xugando a postures tactiques".

Polo que toca al papel que va desarrollar el Bloque por Asturies na reforma estatutaria, Palacios declaró que "vamos siguir na nuestra posicion" y anunció que "nesti añu 2006 "vamos facer una campaña fuerte de sensibilización social con esti tema de la reforma estatutaria" sorrayando que la so organización d'otra manera "nun va participar en nengún alcuerdu o pautu de gobiernu que nun-yos reconoza a los ciudadanos asturianos los mesmos derechos políticos, sociales y llingüísticos qu'al restu de los ciudadanos del estau y que nos faiga de menos". Anque Palacios defendió la independencia del criteriu de Bloque por Asturies, tampoco nun franció amarres con Izquierda Xunida, la fuerza política cola que se presentaron en coalición a les elecciones del 2003, afirmando qu'Izquierda Xunida "tresmite nesti momentu lo mesmo que nosotros y creemos qu'hai llinia compartida ente ellos y nosotros no tocante a la cuestión del estatutu"