Rafael Palacios afita la “asturianidá induldable” del Navia-Eo

En calidá de director de Cooperación del Principáu d'Asturies, el dirixente del Bloque por Asturies unvió esta mañana un comunicáu en que quier aclariar la so posición énte les "noticies y situaciones qu'afecten a la realidá llingüística, cultural y política de los Conceyos del Eo-Navia y a les obligaciones que'l Gobiernu d'Asturies tien na defensa de los derechos llingüísticos, culturales y políticos de tolos asturianos y asturianes". El Director de Cooperación diz que quier con ello afogar "confusiones interesaes" y sorraya en primer llugar la "induldable y incuestionable asturianidá cultural y política del territoriu Eo-Navia" p'afirmar darréu d'ello que la "competencia de la política llingüística nos Conceyos del Eo-Navia tienla n'esclusiva el Gobiernu d'Asturies" citando p'afitalo l'Estatutu d'Autonomía, la Llei d'Usu y Promoción del Asturianu, los Decretos de Toponimia del añu 2002, l'Alcuerdu de Gobiernu 2003-2007 y el Plan de Normalización Social del Asturianu 2005-2007

Palacios afirma que'l Gobiernu de Galicia nun tien atribución nenguna pa tomar iniciatives qu'afecten a los Conceyos del Eo-Navia y la so llingua, polo que diz que "nun se puen tolerar los intentos d'inxerencia del Gobiernu de Galicia o d'Esquerra Republicana de Catalunya nos asuntos llingüísticos, culturales o políticos que-y competen a Asturies" condenándolos "con toa enerxía" Rafael Palacios, que s'ofrez, "dede'l nivel de responsabilidá que tengo en Gobiernu d'Asturies a trabajar pa que les instituciones asturianas se dean a valer, tanto nes sos declaraciones públiques como nes iniciatives de defensa de la personalidá llingüística, cultural y política del gallego-asturianu o fala y de los asturianos y asturianes de los Conceyos del Eo-Navia".

En cuantes a la situación llingüística del Navia-Eo Palacios échase al pie de la Llei d'usu y Promoción del Asturianu y de Plan de Normalización pa llamar a la llingua d'aquellos conceyos gallego-asturianu o fala. La Propuesta de Normes Ortográfiques del gallego-asturianu, espublizada pol Gobiernu d'Asturies nel 1993 ha ser pa Palacios la norma propia d'esta llingua que Rafael Palacios diz que precisa "del esfuerzu conxuntu de los movimientos sociales, del Gobiernu d'Asturies y de les instituciones asturianes competentes na materia, sobremanera la Oficina de Política Llingüística y l'Academia de la Llingua Asturiana".