Radio Sele va entamar una campaña pa reclamar la so llicencia d’emisión

Va agora un añu, los responsables de la emisora uvieina Radio Sele, primer radio qu'entamó a emitir n'asturianu dafechu tola so programación -allá pel 1986- anunciaben arguyosos qu'una sentencia xudicial del Tribunal Superior de Xusticia d'Asturies fallaba al favor de la emisora'l procesu llegal que tenía Radio Sele pola recuperación de la llicencia d'emisión que consiguiere nel 1999 nos últimos meses del mandatu de Sergio Marqués nel Gobiernu asturianu y que'l primer executivu d'Areces-yos retirare dos años dempués.

El fallu del pleitu al favor de Radio Sele suponía que la emisora hasta entós non-profesional podía convertise na primer emisora de radio qu'emitiere n'asturianu con llicencia comercial y compitiendo coles demás emisores del dial. Sicasí, ún añu dempués Radio Sele sigue como emisora llibre nel 106.5 de la FM, mientres que nel 97'9 FM, frecuencia que-y correspuende llegalmente, alcuéntrase la emisión de "Punto Radio" una emisora que, según los responsables de Radio Sele, ta ocupando illegalmente la so frecuencia. Dende Radio Sele afírmase que Juan Ignacio Mortera Martínez, persona que recibiere nel añu 2001 la llicencia que se-y diere de mano a la emisora uvieina ta ocupándola indebidamente emitiendo y que-y la tien alquilada a la cadena Punto Radio, cadena qu'emite con una antena dende'l Monte Naranco y qu'amás abrió apocayá unos estudios na Cai Julián Cañedo de la capital asturiana. Tol procesu, que dura yá 6 llargos años, ta torgando la salida a les ondes comerciales de Radio Sele, una salida que Xuanxo Mariño, responsable de la emisora, comentó a Asturies.com que yá se pudiere dar nel 2001 de nun ser por tolo qu'asocedió darréu de que se-y retirare a Radio Sele la llicencia naquel mesmu añu.

Los responsables de Radio Sele tienen presentada denuncia por esta ocupación de frecuencia énte'l Xefe de Telecomunicaciones n'Asturies y énte'l Director Xeneral d'Infraestructures del Principáu d'Asturies, un pasu llegal previu a la campaña mediática y de presión social en tolos ámbitos que va entamar dende agora Radio Sele, dalgo pa lo que la emisora cuenta col sofitu de la organización Xunta Pola Defensa de la Llingua Asturiana. Representantes de la Xunta comentaron a Asturies.com que la situación de Radio Sele ye "Intolerable" y que la organización entiende que l'asuntu ye "casus belli" polo qu'ufierta "tol apoyu a Radio Sele pa facer denuncia política del bloquéu del gobiernu asturianu y d'esti casu de corrupción".

Como un primer pasu d'esta campaña conxunta en defensa de los derechos de Radio Sele, representantes de la Xunta Pola Defensa de la Llingua Asturiana y de Radio Sele caltuvieron esta mañana una entrevista col grupu parllamentariu d'Izquierda Xunida, recibiéndolos la diputada autonómica Paloma Uría, quien-yos manifestó que diba tresmitir les reivindicaciones de la emisora uvieina a les estayes de gobiernu correspondientes.