Radio Sele pide sofitu económicu pa poder continuar coles emisiones

La única radio qu’emite dafechu n’asturianu, Radio Sele, ta pasando per problemes económicos graves que-y compliquen el pagu del llocal y afrontar los sos gastos. Por esti motivu pide sofitu económicu pa siguir coles sos actividaes.

Estos tiempos últimos tán siendo percomplicaos pa la cadena que suma más de 25 años nel dial. L’añu pasáu, el xefe de Telecomunicaciones nel país, José Antonio Díez Menéndez, obligaba a los sos responsables a pesllar la emisión pel FM, dexando a Radio Sele como alternativa única la emisión per Internet. Ello, sumao a la imposibilidá d’introducir publicidá por nun tener llicencia comercial –llegó a recibila nel 1999, pero Vicente Álvarez Areces anulóla al entrar nel Gobiernu– y a la crisis económica que vive’l país, tán dificultando la continuidá de la cadena.

Col oxetivu de caltener la so actividá, Radio Sele solicitó recién sofitu económicu a tolos asturianos, pidimientu que ta teniendo munchu ecu nes redes sociales. Asina, la emisora n’asturianu fixo públicu’l so númberu de cuenta pa recibir ingresos de les persones que quieran collaborar col proyeutu:  3059 0001 18 2366328629. Ésta ta a nome de l’Asociación Cultural Secha na Caxa Rural.

Otra manera, el grupu ultra del Uviéu, Symmachiarii, va colocar urnes nel Carlos Tartiere Nuevu mentes el partíu del domingu énte’l Guijuelo (18.30 hores) pa recaudar perres p’ayudar a Radio Sele. Los aficionaos azules nun escaecen qu’esta emisora foi la única que restresmitía los partíos del Uviéu nel 2003 tres el descensu a Tercera División por impagu de les fiches a los futbolistes tres baxar de Segunda División.