La emisora única n’asturianu dafechu sigue lluchando pa sobrevivir. Tres el balón d’oxíxenu que supunxeron les aportaciones económiques de primeros d’añu, Radio Sele precisa agora de socios pa siguir cola actividá y tornar al FM.
Les perres recaudaes poles munches muestres de solidaridá recibíes por parte d’oyentes, músicos asturianos, afición del Uviéu y dellos coleutivos foron alredor de 3.000 euros, lo que permitió a Radio Sele cubrir el presupuestu de la primera metá del añu –el gastu aproximáu pa caltener les emisiones ye de 6.000 euros añales–. Sicasí, esti tipu d’ingresos nun tienen continuidá nel tiempu, polo que les persones que tán al frente del proyeutu consideren necesaria la incoporación de socios nuevos pa continuar cola actividá de la radio, col oxetivu de cambiar de llocal y retomar les emisiones pela Frecuencia Modulada (FM).
Hasta hai pocos díes, el númberu d’asociaos yera de 10, cantidá que ta creciendo, anque non nel ritmu necesariu p’asegurar la continuidá de Radio Sele. Los responsables de la emisora punxeron el día 25 de xunu como fecha pa tomar una decisión; esa xornada ta convocáu un conceyu nel que se valorarán toles posibilidaes. “Ta complicao. A ver si somos quien a ello”, responde Xuan Xosé Mariño, direutor de Radio Sele, a la entruga de cómo tán les posibilidaes de siguir emitiendo. “Tamos recibiendo cuotes de socios nuevos y el esperaremos al 25 de xunu pa valorar les posibilidaes y tomar una decisión”, añade Mariño.
La continuidá de Radio Sele será amás pa dar un pasu alantre, con un cambiu previstu de llocal, recintu que permitiría la vuelta de la emisora a la FM, de la que salió n’ochobre del 2011 por orde de la xefatura de Telecomunicaciones d’Asturies al considerar que l’antena dende onde emitía yera illegal. Ello llevó a los responsable de Radio Sele a optar por continuar col trabayu per Internet hasta poder tornar al FM, situación qu’agora se podría dar. Les persones que quieran facese socies y collaborar na continuidá de la emisora única n’asturianu dafechu han de remitir un documentu que pueden atopar na web de la radio y al final d'esta noticia en dolcumentos adxuntos, o ponese en contautu colos sos responsables. La cuota mínima ye de 6 euros al mes, anque hai la posibilidá tamién d’aumentar la cantidá a aportar según les posibilidaes económiques de caún.
Adxuntu | Tamañu |
---|---|
![]() | 54.81 KB |
![]() | 75.5 KB |