“Quixera tener competencies pa poner restricciones de movilidá, pero nun les tengo”, llamenta Barbón

“L’estáu d’alarma debería siguir p’aquelles comunidaes que tán n’otra fase la epidemia per dos selmanes más polo menos”, aseguró Adrián Barbón, que llamentó nun tener competencies pa poder restrinxir la movilidá. El presidente anunció que va entainar la ellaboración de la Llei de Salú Pública, una norma que dará a Asturies la posibilidá de declarar la emerxencia sanitaria.

Barbón nun ocultó’l so esmolecimientu pola llegada dende’l día 21, fecha na que terminará l’estáu d’alarma, de ciudadanos d’otres comunidaes que tán nuna peor situación epidemiolóxica qu’Asturies. “L’estáu d’alarma foi’l meyor instrumentu pa responder a la pandemia; supunxo salvar vides”, aseguró na so rueda de prensa de los sábados –la penúltima, yá qu’informó que la siguiente va ser la cabera– pa informar de la situación de crisis sanitaria pola pandemia de COVID-19, y naguó por una prórroga nueva “non pa toles comunidaes, por exemplu Asturies ta yá en condiciones de pasar a la normalidá nueva, sinón pa qu’aquelles que tán nuna peor situación epidemiolóxica”.

Considera una mui mala noticia que nun se produza y culpa d’ello “a la tensión y alderique partidista col que s’afronta esti tema” en Madrid, “una cuestión que siempre critiqué”. Nesi sen recordó que “nun hai otru marcu xurídicu llegal pa restrinxir la movilidá, nin tien competencia’l Gobiernu d’España nin la tengo yo por desgracia como presidente del Principáu d’Asturies, sinón que depende del Congresu”, y esclamó “qué más quixera yo, y quiero dexalo nidio, que tener competencies como presidente del Principáu d’Asturies pa poder tomar eses decisiones, pero nun les tengo”.

Con urxencia

El presidente apuntó tamién que estos meses tamién sirvieron al so Gobiernu pa “reflexonar de les carencies del nuesu propiu sistema y deprender de los errores cometíos”. Asina, “deteutamos la necesidá de qu’Asturies contara con una Llei de Salú Pública, que nosotros teníemos nel plan normativu de gobiernu, que permitiera afrontar situaciones como les que tamos viviendo”.

Prevista pa la segunda metá de llexislatura, “creo que nun fai falta qu’esplique qu’agora ye más urxente que nunca. La Conseyería de Salú tien enriba la mesa la necesidá urxente d’ellaborar colo que deprendimos na xestión d’esta pandemia, una Llei de Salú Pública que nos permita dientro del marcu de les nueses competencies equiparanos a otres comunidaes autónomes que tienen por exemplu la posibilidá de declarar la emerxencia sanitaria”.

Galicia, por exemplo, va salir el llunes del estáu d’alarma al “contar con medios dende’l puntu de vista llexislativos suficientes que-y pemiten tomar midíes como la emerxencia sanitaria”. Nesi sen entiende mui necesario ver qué figures funcionen n’otros comunidaes autónomes pa deprender “qué necesitamos pa tener una respuesta suficiente y proporcional a les posibles crisis de salú pública que se nos planteguen nel futuru”.

El día 21, cola fin del estáu d’alarma, entra a valir “una regulación xeneral que nos indica qué ye eso de la normalidá nueva que básicamente quiero resumilo na necesidá d’usar mázcara de forma permantente, la necesidá de manter la distancia de seguridá respeuto al restu de persones, la necesidá de tener siempre presentes les midíes d’hixene mentanto nun apaeza una vacuna o un tratamientu eficaz col cornovirus. Nun vamos a vivir como vivíamos nel pasáu”. Habiendo esa regulación estatal “y faciendo usu de les nueses competencies, tamos trabayando yá nun decretu que regule la nueva normalidá d’Asturies que va dir graduándose a midida que vayamos viendo la propia evolución de la incidencia de la pandemia na nuesa comunidá autónoma. Nun ye un tema menor, ye un tema fundamental”, anunció Barbón.

El presidente sigue apostando pola prudencia, “reactivando la nuesa economía con normes de seguridá y tendiendo a avanzar, pero con pasos firmes. La mayor amenaza pa la economía y el futuru d’Asturies ye la esistencia de biltos”. Llamó a la responsabilidá individual y recordó la importancia de los mayores n’Asturies, “comunidá que los venera como memoria viva de la nuesa tierrra”.

Semeya obra d'Armando Álvarez.