Quirós señala que’l Gobiernu “paez que tien la intención” d’apoyar la creación de la especialidá d’asturianu

Esti xueves celebróse la primer mesa-taller de les cuatro coles que la XDLA fai una revisión del Llibru Blancu. Nella, Beatriz Quirós señaló que’l Gobiernu “paez que tien la intención” d’apoyar la creación de la especialidá d’asturianu.
 
La presidenta de la Xunta de Personal Docente foi una de les convidaes a la mesa-taller dedicada a la Educación que llevaba’l nome de ‘Enseñanza: de la presencia a la normalización’, moderada por Xosé Candel, na que tamién tomaron parte Xosé Antón González Riaño, Paz Fontaciella y Iris Díaz Trancho. Quirós destacó la importancia de la creación de la especialidá d’asturianu, yá que “ensin ella nun vamos a nengún llau”. “Ye’l tema prioritariu dende la Xunta de Personal y tendría que salir esti añu”, afirma la representante de SUATEA, que recuerda “que perdimos un tren, que yera’l Decretu d’Especialidaes que se publicó nel BOE l’añu pasáu” pol silenciu de la Conseyería d’Educación, con Herminio Sastre al frente, tres una consulta fecha pol ministeriu.
 
 “Agora la conseyera nueva, cola que tuvimos falando esti martes, paez que tien la intención” d’apoyar la creación de la especialida, como incluyía FAC nel so programa eleutoral, señala Quirós. “Tán faciendo un estudiu xurídicu y paez que tien interés”, añade la presidenta de la Xunta de Personal Docenta, que considera “que ye’l momentu de crear opinión, volver a salir a la cai y dicir a la xente qu’esto ye de nueso, que tenemos que defender el nuesu patrimoniu. Dende llueu, la posiblidá de creala ta en manes del Ministeriu d’Educación, pero pa que tome esta midida tien qu’haber una presión social tanto equí como en Madrid. En Madrid tien qu’haber fuercies sindicales y polítiques que lo defendan”.
 
El tema de la especialidá, xunto al estáu del asturianu n’Infantil y en Secundaria, foron los asuntos más trataos a lo llargo de la mesa-taller que tuvo llugar nel salón d’actos del Antiguu Institutu. González Riañu encargóse de falar de la situación na Universidá, calificando como “un llogru” los avances algamaos nos años últimos. Mentes, Fontaciella esplicó de manera detallada tolos problemes qu’atopa la nuesa llingua en Secundariau y Bachilleratu, n’especial cuando los alumnos lleguen a cuartu de la ESO, asina como la situación del profesoráu.
 
Pela so parte, Díaz Trancho comentó los trés aspectos nos que la llingua atopa más problemes en Primaria, esto ye, “la optatividá de la materia, la situación del profesoráu y la consideración llegal”. Sicasí, denunció que lo más grave son los problemes qu’atopen los escolinos y escolines d’Educación Infantil, onde’l vacíu llegal que supón l’ausencia del asturianu nel currículu provoca que la nuesa llingua tenga presencia casi nula nesta etapa tán importante pa la formación de los neños y neñes.
 
Tres les intervenciones de los cuatro espertos, llegó’l turnu del públicu, qu’afondó na situación en Secundaria y n’Infantil. Tamién se trató la posibilidá d’entamar esperiencies billingües o trilingües, dalgo que s’incluyía nel Llibru Blanco y que los presentes consideraron “interesante”, anque consideren que primero sería necesario salvar los inconvenientes qu’atopa agora la llingua en tolos niveles educativos. Pa zarrar, Candel aseguró que “la oficialidá acabaría con munchos d’esos problemes” y llamó a la militancia activa, al igual que fixo González Riaño poco enantes al demandar la necesidá de que los asturianos utilicen la llingua del país cola alministración o entidaes publiques. “Hai qu’exercer los llogros algamaos; facelos operativos”, reclamó.
 
El 1 de febreru, medios de comunicación
 
Esti ciclu de meses-taller entituláu ’15 años del Llibru Blancu: revisión y actualización de la política llingüística’ va continuar el 1 de febrero, anque nesta ocasión l'actividá entamada pola Xunta pola Defensa de la Llingua Asturiana (XDLA) va tener llugar n’Uviéu, na sala d'actos del Departamentu de Filoloxía Española de la Universidá. Esti alderique lleva’l nome de ‘Medios de Comunicación na sociedá de la información', cola participación de Naciu Varillas, Ana Vanessa Gutiérrez, Próspero Morán y Cristóbal Ruitiña. Rubén Ardura modera’l debate, que va principiar a les 18 hores.
 
Na semeya, Beatriz Quirós, Paz Fontaciella, Xosé Antón González Riaño, Iris Díaz Trancho y Xosé Candel.