Quini pide que se potencie l'enseñu del asturianu nel so ingresu na Fundación Caveda y Nava

|
Quini Fundación Caveda y Nava con Eugenio Prieto y Inaciu Iglesias

Xornada añal de la fundación de defensa del asturianu.

La Fundación Caveda y Nava presentó esti sábadu al ex - futbolista Enrique Castro "Quini" como nuevu patronu d'honor de la institución, dedicada a la defensa del asturianu y qu'intenta llograr un consensu social al favor del reconocimientu de la lingua. Nes sos palabres de saludu al recibir el diploma acreditativu.

Quini agradeció-y a la Fundación el xestu de reconocimientu y declaró que lo más importante pa la supervivencia del asturianu yera que se potenciare la so enseñanza nes escueles. L'ex - futbolista comentó que se decatare del apreciu pola llingua propia de los catalanes na so etapa de xugador nel Barcelona y reconoció que-y prestaría que muncha xente n'Asturies falare asturianu y lo valorare de la mesma forma qu'en Cataluña.

La xornada tuvo marcada pola rellación y compromisu del mundu del deporte col asturianu, y ello ye qu'ente los asistentes al actu alcontrábense los ex- presidentes del Real Uviéu Manuel Lafuente y Eugenio Prieto, que fexo la presentación de Quini rescamplando la so importancia como deportista y como persona penriba de diferiencies de colores d'equipu que, d'otra manera, quedaron clares nel actu.

El presidente de la Fundación, Inaciu Iglesias, sorrayó nel so discursu institucional la necesidá de facer oficial l'asturianu como "única manera de salvar la llingua" y afitó que, en cuenta d'una obligación la oficialidá "ye un derechu que tien de tar penriba de les diferiencies ente partíos".

La Fundación presentó tamién esti sábadu'l llibru "Al pie de la lletra" una obra que fai estoyu de los testimonios en prensa y declaraciones públiques de más de 200 asturianos de toa condición recoyíes a lo llargo de los últimos 30 años y nes que se reconoz la importancia de la llingua asturiana y la necesidá de la so normalización.

La conferencia del xurista navarru Xabier Arzoz sobre l'estatus llegal del euskera na comunidá foral navarra echó'l piesllu al actu, al qu'asistieron, ente otros, el conseyeru de Xusticia Javier Valledor, la dirixente del PP de Xixón, Pilar Fernández Pardo y el ex diputáu pola URAS y el PP, Leonardo Verdín.

Contador Estadistiques