Quince marques de sidra DOP participen en Madrid nel Salón de Gourmets

El XXV Salón de Gourmets, que se celebra dende’l llunes hasta’l xueves na Feria de Madrid, va contar cola participación de 15 marques de sidra DOP. Diez mil persones van poder pasar pel ‘Túnel de la Sidra’ y prebar la nuesa bébora.
 
Les profesionaes del escanciáu Loreto García y Natalia Menéndez van ser les encargaes d’echar sidra nesti túnel pa que los hosteleros que visiten el stand instaláu pol Conseyu Regulador ‘Sidra d’Asturies’ preben 15 marques diferentes d’esta bébora con Denominación d’Orixe Protexida, entre les que tamién tienen presencia la sidra d’espresión nueva y la esplumosa. Éstes son Ramos del Valle, El Santu, Llaneza, Sopeña, Val de boides, Val d´Ornón, Villacubera, Zythos, Valdedios, Españar, Escalada, Valle Ballina y Fernández, Zapica, Pomma Áurea y Urriellu.
 
Les persones que s’averen al stand de ‘Sidra d’Asturies’ tamién van poder disfrutar el miércoles d’una preba de sidra DOP de cinco llagares y quesos asturianos oficiada pol periodista gastronómicu David Fernández-Prada. Yá de xueves, el críticu Andrés Proensa va dirixir una preba nueva de sidra con Denominación d’Orixe. L’oxetivu del Conseyu Regulador cola so presencia nel Salón de Gourmets de Madrid ye promocionar la bébora tradicional d’Asturies fuera de les nueses llendes y abrir mercaos nuevos.