Quimarán y El Pieloro "son topónimos n'usu y aceptaos"

El profesor de la Universidá d'Uviéu, filólogu y espertu en llingua asturiana y toponimia, Fernando Álvarez Balbuena, responsable del trabayu de campu sobre los topónimos del conceyu de Carreño, aseguró que Quimarán, ye'l d'usu habitual, "vivu y aceptáu" polos vecinos d'esta parroquia carreñense.

En declaraciones a Europa Press, refugaba agora'l posible cambiu que'l Conceyu de Carreño, amás de la supuesta demanda vecinal, va proponer a la Dirección Xeneral de Política Llingüística pa que se recupere como oficial el términu Quimarán.
  
Balbuena foi'l que dirixó l'equipu d'encuestadores, tanto nesta zona como na d'El Pieloro, parroquia na que se plantegó un casu análogu, pues dellos vecinos protestaron esixendo que se recuperare como oficial el términu Piedeloro.
  
N'ambos casos, el profesor niega la mayor: Quimarán y El Pieloro "son términos vivos, usaos pola mayoría de los falantes d'asturianu, y non sólo por persones mayores, sinón de toles edaes, tamién moces".
  
N'ambos casos pon en duda les "supuestes encuestes" nes qu'agora se basen les asociaciones de vecinos d'ambes parroquies pa solicitar al Conceyu de Carreño un nuevu cambiu del decretu pol que'l Conseyu de Gobiernu aprobare los topónimos propuestos pola Xunta de Toponimia.
  
Asina, recuerda que nes encuestes qu'él realizó los entrevistaos "utilizaben los términos Quimarán y El Pieloro con total naturalidá". Niega amás qu'haya nengún conflictu nes parroquies, y asegura que visitó recientemente ambes zones y que la xente asumió los términos tradicionales "sin nengún problema". Por esti motivu, considera que'l discutiniu surdíu débese a la voluntá de delles persones concretes, y non a la xeneralidá de los vecinos.
  
Calcó amás en qu'ambos términos, Quimarán y El Pieloro, son evoluciones de les formes arcaiques Guimarán y Piedeloro.
  
Postura de Ramón d’Andrés
El filólogu Ramón d'Andrés, pela so parte, miembru nel so día de la Xunta de Toponimia de Carreño, nun vio nengún inconveniente en que se recupere'l términu Guimarán, "si Quimarán xenera malestar ente los vecinos", anque insistió en qu'ambos, "Quimarán y Guimarán", son "igualmente asturianos".

Nel casu d'El Pieloro, refugó dafechu la posibilidá de que se recupere'l términu El Piedeloro, porque sería "incumplir" la normativa no que se refier a la recuperación de topónimos, y calcó en que se trata d'un topónimu tradicional que ta n'usu.