Queipo taría dispuestu a falar d’oficialidá si nun implica ‘obligación’

“Hailos que defenden que pue esistir una oficialidá que nun suponga una imposición y una obligación d’aprendizaxe pa los asturianos, pero si hai daquién que consiga esa fórmula, falamos”, aseguró Álvaro Queipo esti llunes en ‘TPA Noticias. Matinal’. El presidente nuevu del PP dixo del asturianu que “ye un bien inmaterial qu’hai que protexer y promocionar”.

“Ye una xoya que tien Asturies, ye un patrimoniu inmaterial que pertenez a tolos asturianos, ensin esceición” respondió a una entruga del presentador, Miguel González, depués de que Queipo falara de la necesidá d’un “debate programáticu que nos refuercie na nuesa parte de programa y d’idea p’Asturies”, trabayu que pretende poner en marcha “nos meses próximos”: “¿Y pronunciaránse sobre l’asturianu, por exemplu?” yera la pregunta. Y nesti puntu aprovechó p’afirmar que “l’únicu partíu políticu na historia d’Asturies que fixo dalgo por defender y por promocionar l’asturianu dende’l Gobiernu, esto ye, con lleis; esto ye, de forma real, foi’l Partido Popular col Gobiernu de Sergio Marqués”, en referencia a la Llei d’Usu y Promoción del Bable/Asturianu del 1998 y ensin citar al Partíu Asturianista (PAS).

Sobre la reforma del Estatutu señaló que “a lo llargo de tola llexislatura anterior, corrieron ríos de tinta sobre l’interés de Barbón, del Gobiernu, al rodiu del asturianu, pero nun hebo nengún solu documentu qu’entrase nel Parllamentu asturianu que falase d’esta cuestión. Frente a un Gobiernu del Partido Popular que, dientro de la llibertá individual y ensin obligar a naide a nada, consiguió protexer l’asturianu, fíxese que diferencia con un Gobiernu que nun movió un papel en cuatro años por facer dalgo pola llingua asturiana”.

“¿Vusté ta a favor o non de la oficialidá del asturianu?”, siguió l’entrevistador. “Non, yo nun toi a favor de la oficialidá del asturianu. Yo creo que l’asturianu ye un patrimoniu de tolos asturianos, un bien inmaterial qu’hai que protexer y qu’hai que promocionar, que ye una riqueza de toos, pero nun soi partidariu de qu’haya qu’obligar a naide a utilizalu. Sentimos munches veces eso de la ‘oficialidá amable’, hailos que defenden que pue esistir una oficialidá que nun suponga una imposición y una obligación d’aprendizaxe pa los asturianos, pero si hai daquién que consiga esa fórmula, falamos. Pero yo nun puedo tar a favor d’obligar a los nuesos mozos, a los nuesos trabayadores públicos y a los asturianos en xeneral a utilizar y deprender una llingua. Sí que toi a favor de fomentar que’l que quiera la utilice y la prautique y pueda dirixise inclusive a l’Alministración gracies a una llei del Partido Popular”, espresó Queipo.