Quedamos los llunes y los martes pa falar asturianu

Tornen los grupos informales de conversación del Conseyu de Mocedá de Xixón y Iniciativa pol Asturianu col mesmu formatu presencial y telemáticu que la temporada pasada.

"Estos grupos, de baldre y nos que nun importa’l nivel d’usu o conocencia, tán empobinaos a toles persones que necesiten d’un espaciu informal, relaxáu y seguru onde quitar el mieu a falar n’asturianu en públicu", apunten los entamadores de ¡Vamos Falar!. Asina siguen la mesma idea que los de francés, l’inglés y l’alemán qu'acueye'l llar del Conseyu de Mocedá, creando sitios seguros "onde l’asturianu medre ensin tar estigmatizáu, p’amosar que se pue falar n’asturianu en toles situaciones sociales, seya cola familia o na cai, nel supermercáu o colos amigos".

Los llunes caltiénense como día de los alcuentros presenciales, mentes que los telemáticos, pela plataforma Zoom, pasen a los martes, les dos xornaes a les 17 hores. Les primeres sesiones van tener llugar el llunes vinienente y el día 13, de manera respeutiva, y les inscripciones yá tán abiertes na páxina d'Iniciativa pol Asturianu.