Queda en suspenso la condena a Cándido y Morala

La xuez sustituta por vacaciones del maxistráu Lino Rubio, titular de la sala de lo Penal númberu 1 de Xixón, dictó ayeri un autu pa la suspensión de la execución de la sentencia contra los sindicalistes Juan Manuel Martínez Morala y Cándido González Carnero, colo que queda en suspenso'l cumplimientu de la condena de 3 años de cárcele pa los sindicalistes que recibieren el tercer grau penitenciariu.

D'otra manera, simpatizantes de Cándido y Morala y los mesmos sindicalistes asistieron ayeri a la estación de tren de Xixón pa recibir al tren en que veníen los escritores y participantes nel certame lliterariu Selmana Negra acompañaos del Presidente asturianu Vicente Álvarez Areces. Un retén de policíes antidisturbios impidieron que los más de cien manifestantes pudieren allegase hasta'l xefe del executivu autonómicu.

El Conceyu de Xixón, al que los sindicalistes acusaren de tar tres de la denuncia pola que los condenaron, emitió tamién ayeri un comunicáu congraciándose pola lliberación de los sindicalistes y nel que declaró que siempre-y abultare "escesiva" la pena de Morala y Carnero, ello con axustase a derechu, polo que pidió l'indultu y la suspensión de la condena a pagar multa". El Conceyu de Xixón afirma que se vio metíu "nun bastiáu d'insultos, medies verdades o mentires dafechu" no tocante al casu de Cándido y Morala.